Daily Newspaper

Kristian ten RSS lakah ngaihdan an thlak tawh ti

15

Senior Rashtriya Swayamsevak Sangh leader Indresh Kumar chuan Christian community tena Sangh laka an ngaihdan an thlak tawh tia sawiin Sangh ‘huat’ ringawtin engmah hlawkna an neih phah lo tih an hrefiah tawh a ni tiin a sawi.

“New India a piang mek” tia sawiin India Christian community te chuan RSS leh an idea of nationalism an ngaihdan an thlak tawh tiin Global Anglican Future Conference leh Anglican Bishops Council of India-te huaihawta Christmas lawmna event buatsaihnaah a sawi.

He event hi RSS leader tena national capital-a karkhat chhunga Christmas lawmna Kristiante leh Muslim leh community dangte nena neiha an tel tum hnihna a ni bawk.

December 16 khan RSS te thlawp Bharatiya Christian manch te chuan Nagaland House-ah Christmas lawmna nei bawkin Kumar chuan thusawina a neihah ‘sakhua inngeihna, inunauna, hmangaihna leh remna’ thehdarh turin a ngen a ni.

Christmas kaihhnawih event pahniha a telna chhan chu Goa Assembly poll nakum kumtir lama neih mai turah Christian community te vote hip tumna a ni em tia zawhna chu Kumar chuan, “Inthlan nen inzawmna a nei lo. Mahse, inthlan a nghawng a nih chuan thil dik lo a awm hlei nem” a ti.

“Tun hnaiah Christian ten an ngaihdan an thlak nasa tawh a. RSS huat leh RSS nationalism huat chuan engmah hlawkna a thlen lo tih an hria a, an vote-a ten engmah an thlensak chuang lo” tiin a sawi.

“RSS leh RSS te idea of nationalism chu tun hmaa an hriat dan nen a inang lo tih an hrefiah tawh a. India thar a piang mek a ni” tiin RSS leader chuan a sawi bawk.

A hma pawhin Kumar chuan event pakhat India ram hmun hrang hranga bishop-te bakah Muslim leader-te pawh fuankhawmnaa thusawina a neihah sakhuana lama inremna, inunauna leh sakhua inzahtawnna a awm theih nana hma la theuh turin a ngen a ni.

“Kan hmaa zawhna awm chu sakhuaa inhmelmak buaina khawvel nge kan duh sakhua inhmelmakna awm lo, gender thliar hranna awm lo, tawh thiang lo leh nunrawnna awm lo. Hengte hi ngaihtuah ila, hma la ila, tichuan buaina a reh mai ang” tiin a sawi.

“Chumi tur chuan India hi hmun tha ber a ni a, chenna In theuh atanga bultan theih a ni. Indian ten sakhaw inngeihna, sakhaw inunauna, sakhaw inzahtawnna leh sakhaw kal firfiak kan duh lohzia intiama kan lantir chuan thil a inthlak danglam mai ang” tiin Kumar chuan a sawi bawk.

Community hrang hrangte chu an sakhua theuh zawma sakhaw dangte pawh inzahtawn sak turin a ngen bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy