- BJP Mizoram
Kristianten harsatna an tawh apianga Mizorama pawl thenkhatin BJP puh hmingchhiatna atana remchang la thin, Kristian missionary harsatna tawk thinte tana an puihna hre hmasa loa, tih hmingchhiatna tum thin an awm tih BJP Mizoram chuan an sawi.
BJP Mizoram State thuchhuak chuan, Chattisgarh state Narayanpur leh Orchha thingtlang khuaa tribal chhungkaw rethei hmeichhe pathum an puih kawnga Kerela-a Catholic nun pahnihin jail an tan phah chu pawi a ti a. Kerela-a BJP State president Rajeev Chandrasekhar leh a thawhpuiten jail atanga chhuah zalen thuai an nih theihnan hma an la a, a bul atanga a tawp thlengin nun-te tan hian an dingnghet hle tih a sawi.
BJP Mizoram pawhin Chhattisgarh-a BJP State general secretary Sanjay Srivastava leh Narayanpur bialtu MLA Kedar Nath Kashyap chu phone-a bia in, tribal hmeichhe pathum leh an chhungte ngaihven tura ngen an ni a. Narayanpur SDM leh Narayanpur Panchayat CEO pawh biak niin, tribal hmeichhia harsatna tawkte Sarpanch/VCP te nen a theih dan dana ngaihven turin a ngen tih a sawi bawk.
Midang tana inpe missionary-ten Chhattisgarh-a tribal retheite zinga an rawngbawlna hian ngaihhlut a hlawh a, Pathianin an rawngbawlna mal a sawm a, tihdam rawngbawlna pawh Pathian-in a hmang nasa hle tih sawiin, nun pahnih leh an thawhpuite tawrhna hian rah tha a chhuah zel ang tih BJP Mizoram chuan a ring tih a sawi. Chutih rualin Kristianten harsatna an tawh apianga Mizorama pawl thenkhatin BJP puh hmingchhiatna atana remchang an la thin leh BJP Mizoram-in Kristian missionary harsatna tawkte an puihna hre hmasa loa, party tih hmingchhiatna atana an hmang thin chu ti tawh lo se an ti a, India rama Kristiante tan an awm reng tih Mizoram mipui hriatah an puang tih a sawi a ni.