Kuhva leitu ‘mazon’-te la lang lo

Mizoram kuhva thar lei tura ‘mazon’-te rawn lan a hun tawh a, mahse vawiin thlengin an la rawn lang lo. Kuhva hralh a har dawn tihna nge ni dawn? Chu chuan kuhva huan neite rilru a luah a, foreign atanga kuhva lakluh, phur chhuah leh tur dan tuma an ‘duty’ chhan pawh a ni.
Hachhek Bial Kuhva Chingtu Pawl hruaitute chuan kuhva leitu ‘mazon’ an la rawn lang lo tih an sawi a, May vel te kha an rawn lan hun a ni daih tawh a, kuminah July-ah pawh an la rawn lang lo an ti.
An sawi danin, kuhva hi May velah a par tan a, a par tirh atang hian ‘mazon’ an rawn lang tan thin. A hmunah an en a, an hauh a, sum te pawh a then a zar an inpe lawk thin. May leh June vela sum an lo dawn lawkte chu kuhva huan neite tan chhenfakawm a tling a, chuvangin ‘mazon’ an rawn lang lo an tih hian, nakinah an hralh thei lo ang tih a hlauhawm a ni ringawt lo a, tunah an khawsak a nghawng tawh.
Kuhva hi a par tawh a, a rah tawh hial. Chutiang hunah ‘mazon’ an la lang lo hian an ngaih a titha lo a, foreign kuhva-in an kuhva hralhna a tibuai tih chu an hriatthiam dan ber a ni.
Hachhek bialah Hachhek Bial Kuhva Chingtu Pawl an awm a, Bilkhawthlir Kuhva Chingtu Cooperative Society leh Vairengte Kuhva Chingtu Cooperative Society an awm bawk. Heng pawl pathum huam chhunga mite hi kuhva thar hnem an ni ang. Pawl pathumte hi Kuhva Chingtu Joint Committee tiin an inthlungkhawm leh a, an hna ber chu foreign kuhva tawlh lo dan tum a ni.
June ni 5 atang khan foreign kuhva tawlh dan tumin chhun zan zawmin an duty a, hautak an tih thu leh sorkarin theihtawp chhuah se an duh thu an sawi.
“Mahni hna kalsana hetianga duty hi kan tlin lo a ni ber a, tlin lo chung chungin kan duty a ni,” an ti a, “Duty tura inruat pawh hi a inthlahrunawm,” an ti bawk.
Sorkarin kuhva tawlh lo dan nana a din, Dapchhuaha check gate pawh kuhva tawlhtute’n an paltlang thei a, kudama kuhva dah, kalh hnan thlap pawh a bo thei tih te an sawi a, chutiang a nih laia lo duty chu hna hautak a nih thu an sawi.
Vairengte leh a chhehvela kudam-a kuhva dah, sorkarin man se an tih, July ni 5 thleng an ngaihchan chungchangah sorkar an la ngaihchan thu an sawi a, Kolasib police te’n complaint an thehluh tawh avangin ngaihtha taka an nghah thu an sawi.