Kuhva tam hri avangin kuhva an thi nasa tih Hachhek biala kuhva chingtuten an sawi a, sawrkarin buaipui se an duh tih an sawi.
Mizoram Kuhva Chingtu Pawl (MKCP) Gen. Hqrs hruaitute chuan tunlai hi kuhva (Assam variety) lawh hun leh hralh hun a nih tan avangin khawthlang lam Mamit district-a kuhva chingtute tlawhkualin kar kalta khan an zin chhuak a. MKCP hruaitute hian Hachhek Bial Kuhva Chingtu Pawl (HBKCP) hruaitute nen Kawrthahah an inkawm.
MKCP president C Laldina chuan an pawl lo din dan leh Mizoram kuhva chingtute thawhho a, hma sawn zel tur an ni tih a sawi a. Kuhva chin leh hralh kawngah zau zawka hma lak an tum thu leh South India lama All India Arecanut Growers Association leh state danga kuhva processing unit hrang hrang biakpawha hma lak zel tum a ni tih a sawi. MKCP chu kuhva chinga eizawngtute tan an din tlat tur thu a sawi bawk.
HBKCP secratary Lalvenhima report danin, Hachhek bial hian kum 2023 khan kuhva metric ton 7520.95 an thar a, Rs. 376,047,650 man an hralh. Tunlaiin kuhva tam hri vanga an kuhva a thih nasat vanga harsatna an tawh nasat thu sawiin, an kuhva tam hi department-in buaipui se an duh tih a sawi. Tunlai hian kuhva an hralh mek a, a rate a that loh avangin market tha zawk a awm theihnan sawrkarin chak takin hma la se a duh tih a sawi a ni.
Mamit District Kuhva Chingtu Pawl president Lalthanzuala pawhin rampum kuhva chingtu inzawmkhawm leh thawhhona tha tak neih a pawimawh tih a sawi a. General headquarters hruaitute hmalakna an thlawp tlat thu leh kuhva chingtute zaikhata luan a pawimawh a tih thu a sawi.
MKCP secretary Vanlalruata chuan hma an lak tawh dan a sawi a. Tun dinhmunah Myanmar atanga kuhva lutin ram leilung fate kuhva tharchhuah hralhna kawnga harsatna nasa tak an tawh phah chu pawi a tih thu sawiin, sawrkarin kuhva rah hralh hunlai chuan nasa lehzualin hma lakpui se an duh tih a sawi a ni.
Kuhva natna in a chingtu harsatna siam
