Dan loa kuhva tawlhruk thubuai chu Central Bureau of Investigation (CBI) chhuitir loa sawrkarin Mizoram Police chhuitir turin High Court a ngen tih Hachhek Bial Kuhva Chingtu Pawl chuan an sawi a. CBI chhuitir remti zawk turin sawrkar an ngen.Hachhek Bial Kuhva Chingtu Pawl (HBKCP) thuchhuak chuan, an eizawnna ber kuhva hralh kawnga harsatna siamtu, ramdang atanga dan loa kuhva tawlh luh a tawp theih nan nasa takin hma a la a. Kuhva huan siamtu tlawmngaia duty-te pawhin dan loa kuhva ro tawlh engemawzat a lo man tawh tih a sawi.
Kuhva tawlhruk dangchat turin Mizoram sawrkar tharah beiseina sang tak an nei a, sawrkar hmalak tum dan leh hmalak dan lawmawm an tiin, theihtawp a chhuah mek nia an hriat lai a, kuhva ro tawlhten an tih dan pangngaia an la tawlhru reng nia a lan thu a sawi. Hei vang hian HBKCP chu kuhva tawlhrute dang turin a duty zel dawn a, tawlhru thinten paltlang tum lo turin an hriattir tih a sawi.
Dan loa kuhva ro tawlh chungchanga social activist Pi Vanramchhuangi’n Gauhati High Court-a PIL thehlut a, CBI-in chhui tura High Court a ngenna chu pawm a nih an beisei laiin, Mizoram sawrkarin CBI chhuitir loa, Mizoram Police chhuitir tura High Court-ah ngenna a siam chu pawi an tih thu a sawi. ‘Kuhva ro chungchanga PIL hi CBI chhui remti turin HBKCP chuan sawrkar kan ngen a ni,’ a ti.
Kuhva tawlhruk PIL chungchanga Gauhati High Court Division Bench order-in a sawi anga, kum 2021-a FIR thehluh tawh tun thlenga register a nih loh chhan sawifiah tura a tihte, case thara register theih a nih thu a sawite chu bawhzui a, court-in sawrkar chu he case ngai thutak tawklo a ti chu pawi an ti a. Kuhhnathawktute hmakhaw ngaia huai taka ding a, hma la turin sawrkar an phut tih a sawi.
Sawrkarin thlai thenkhata minimum support price a siam turah kuhva telh ve turin an ngen tih HBKCP hian sawiin, ‘Dan loa kuhva ro tawlhte avangin kuhva thar hralh a harin a man a tlahniam zel a. Kuminah pawh kuhva rah lo zo vek tawh siin, kuhva chingtu engemawzatin a man kan la dawng kim thei lo,’ a ti. Kuhva chingtute au aw ngaihthlak sak turin Mizoram sawrkar an ngen tih a sawi a ni.
Kuhva tawlhruk case CBI chhuitir turin sawrkar kan ngen – HBKCP
