Champhai district kaltlanga dan kalha Kuhva roa sumdawnna chungchang, social activist Vanramchhuangi’n Gauhati High Court, Aizawl Bench-a Public Interest Litigation (PIL) a thehluh ngaihtuahna kal zelah, tunhnai khan Gauhati High Court chuan hemi chungchang hi ngaihtuah lehin Mizoram sawrkar chu he thubuai hi a thara ngaightuah tha leh tur leh, PIL thehluttuin Kuhva ro sumdawnna chungchanga Champhai Police Station-a FIR a thehluh chu engvanga register loh nge a nih sawifiah turin a hriattir.
Court chuan Mizoram sawrkar chu dik tak leh thleibik nei lovin kuhva ro sumdawnna chungchang chhuina chu a tharthawh leh dawn nge, he thubuai chhuina hi CBI kuta hlan mai a duh zawk tih tichiang turin February ni 13, 2024 thleng hun a pe bawk.
PIL thehluttu hian dan kalha kuhva roa sumdawnna khuahkhirh loah Mizoram sawrkar chu puhin, Central Bureau of Investigation (CBI)-in he thubuai hi an chhui theih nan Mizoram sawrkar chu hma la turin a lo phut tawh a ni.
PIL denchhena Court-in thubuai a chhuina atanga a lan dan chuan, Mizoram sawrkar hnuaia Horticulture department chuan, 2019-2020 chhung khan Mizoramah kuhva MT 33,540 tharchhuak angin a record a. Hetih lai hian Champhai district-ah kuhva tharchhuah a ni lo. Directorate of Arecanut & Spices Development (DASD), Government of India, Ministry of Agriculture and Farmers Welfare website-a a lan dan chuan 2019-2020 chhunga Mizoramin kuhva a tharchhuah chu MT 10,840 a ni. Directorate of Revenue Intelligence, Guwahati Regional Unit zirchiannaah chuan Mizoramah kuhva tih-rona a awm lo va, a hringin hralhchhuah thin a ni.
Hetih lai hian Mizoram home department chuan, Champhai leh Khawzawl district-ah 2021&2022 khan kuhva chinna hmun siam a ni a tih laiin, kuhva erawh tun thlengin tharchhuah a la awm lo a, GST hnuaiah register a ni lo, a ti bawk.
The Assistant Commissioner, CGST (Central), Khatla, MG Road, Aizawl-in January ni 18, 2024-a affidavit a thehluhah chuan, State GST leh Commissioner GST (Central) ten Champhai district atanga kuhva phurhchhuahnaah e-way bills an pechhuak tih tarlan a ni a. Kum 2021-2022 chhunga e-way bills pekchhuah hlutzawng hi state sawrkarin Rs.1,028,105,030/- leh CGST-in Rs.3,78,583,260/- a ni a. 2022-2023 chhungin State sawrkarin Rs .1,347,852,630/- leh CGST-in Rs 3,22,793,124/- a ni a. Kum 2023-2024 chhungin state sawrkarin 1,36,041,994/- leh CGST-in Rs. 1,61,158,793/- a ni.
Hemi chungchangah hian, Champhai leh Khawzawl district-in 17.1.2023 thlenga kuhva a tharchhuah loh laia hetiang zat e-way bills pekchhuah a ni leh, 2023-2024 chhunga e-way bills hetiang zat pekchhuah a nih theih dan hi hriat a ni lo; kuhva hi vawilehkhatah a rawn tharchhuak phut te a nih ngawt loh chuan, Court chuan a ti a. Champhai leh Khawzawl district-a kuhva chinna hmun atanga kuhva pakhatmah tharchhuah a nih loh laia hetiang zat e-way bills pekchhuah a ni hi, thil dik lo chu a awm a ni, Court chuan a ti bawk.