Daily Newspaper

Kum 15-18 inkarte COVID-19 Vaccine “COVAXIN” pe tan

23

Nimin khan India ram pumah kum 15-18 inkar thalaite tan COVID-19 vaccine pekchhuah tan a ni a, Mizoramah pawh zawm ve niin nimin chawhma dar 11:00 khan Health & Family Welfare Minister Dr R. Lalthangliana’n PC Girl’s School, Mission Vengah vaccine pek chhuah puala inkhawm a hmanpui.

Minister Dr. R.Lalthangliana chuan thalai tana vaccine pekchhuah a ni ta chu lawmawm a tih thu a sawi a, zirlaite tan a bik takin phai lama zirna chhunzawm tumte tan vaccine lak theih a ni ta hi a tangkai hle dawn a ni a ti.

Health minister chuan Mizoram chu India ram state hrang hrang zingah vaccine pekchhuah hna thawk tha berte zinga mi kan ni hi a lawmawm a, hemi atana theihtawp chhuahtu health department official te, frontline workers leh volunteer te, ASHA, Health Worker leh Health & Wellness officer te, vaccination team hrang hrang hmun kilkhawr ber ber thlenga kal a damlo leh tar chaklote an chenna ngeia luhchilhtute hnathawh that rah a ni, a ti a. Chutih rualin a lo buaipuitu leh lo ngaihsaktu khawtlang hruaitute, YMA te leh LLTF/VLTF-te tawiawmna tha tak kan dawn vang a ni tel, a ti bawk.

Minister chuan vaccine lak tawh avanga inthlahdah tur a nih loh thu sawiin, fimkhur taka kan awm chhunzawm zel a tul a, midangte ngaihtuah reng chunga COVID-19 dona hmanraw tha kan hriat sa hmai tuam uluk, kut silfai that leh midang hlata awmte kha kan zawm chhunzawm rih zel a la ngai, a ti a.

“COVID-19 hrik thar OMICRON hian engtikah nge min luhchilh dawn kan hre lo va, a theih ang chin chinah mitin kan inven fimkhur rih a la ngai hle a. India ram state tam zawkah inkhuahkhirhna an kalpui leh tawh tih sawiin, khawpui lian 10 chuang zetah zan curfew an kalpui leh tawh a, West Bengal phei chuan kum thar atang hian tiam chin awm lovin zirna in an khar bakah mipui punkhawmna hmun leh intawllenna hmun an khar a, sawrkar pisa pawh staff awm zat 50% a kal turin an in ti leh tawh a, hengte hian kan fimkhur tlan a tulzia a tilang chiang hle a ni,” health minister chuan a ti.

Report petu Dr. Eric Zomawia, Mission Director, National Health Mission, Mizoram chuan kum 15 – 18 inkarte tan Covaxin sawrkar laipuiin a ruahman thu sawiin, India ram pumah January ni 2, 2022 atanga pek tan tur tih a ni a, Covaxin hi dose 67,000 December ni 30, 2021 khan Aizawl a rawn thleng a, Mizoramah chuan hun a tepter bakah holiday te a nih avangin Aizawlah chauh vawiinah hi chuan a hawnna pual hian kan pe thei a, district dang atang pawhin vaccine hi an rawn la ang a, tun kar tawp lam hi chuan an pe chhuak theiin a rinawm, a ti a ni.

Mizoramah hian kum 15 – 18 inkar vaccine la thei hi mi nuai khat bawr vel nia chhut an ni a, vaccine dose mamawh zat hi sawrkar laipui atang dawn belh zel tur a ni a, Covaxin hi first dose an lak atanga ni 28-ah second dose lak leh tur a ni.

Covid vaccine pek chhunzawm zel dan turah chuan district tina District Immunization Officer te’n ruahmanna an siam ang a, kum 15 – 18 inkar Covaxin la te hian vaccine chi dang an lak a rem lova, chutiang bawkin Covishield lo la tawhte pawhin second dose atan vaccine chi dang lak a rem lova, vaccine pekna hmunah hian kum 15 – 18 inkarte tan leh kum 18 chunglam te vaccine pekna hmun a hranpaa siam tur a ni.

January ni 10, 2022 atangin India sorkar chuan Healthcare Worker, Frontline Worker leh Kum 50 chin chunglam natna benvawn (Comorbidities) neite zinga vaccine dose hnih la tawhte tan “Precaution dose” pe tan turin ruahmanna a siam a, heng group 3 te zinga precaution dose dawng thei turte chu vaccine vawihnih an lakna atangin thla 9 (Ni 270) a liam tawh chin an ni.

Healthcare workers leh Frontline workers te chu Cowin-ah register sa vek an ni a; tun dinhmunah chuan heng Cowin-a in-register sa, dose 2 dawng tawhte chauh hian precaution dose an dawng thei dawn a, kum 60 chunglam comorbidities nei, Precaution dose la duhte chuan anmahni doctor theuh an rawn ang a, an doctor-in la tura thurawn a pek chuan an la thei ang.

Precaution dose atan hian eng vaccine nge hman tur tih leh, engzatnge a dose tur tih chu Ministry of Health & Family Wlefare in ruahmanna a la rawn siam dawn a ni.

Nimin khan PC Girls School-ah hian kum 15-18 inkar mi 30 hnenah Covaxin hi pek nghal an ni a, vaccine pek chhunzawm dan tur hi Healh & Family Welfare Department-in ruahmanna siamin a puangzar leh ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy