Mizoram leilunga oil leh gas zawn tan a nih atanga kum 20 dawn a liam hnu ah pawh beisei ang hmuh ala ni loa, a zawngtu company lamin an la zawng mek zel tih an sawi.
Oil leh gas zawn hna chak lehzuala thawh a nih theihna’n a mawhphurhtu agency hrang hrangte koin Commerce & Industries minister Dr R Lalthangliana chuan Zirtawpni khan a thutkhawm pui a. Thawhhona tha tak an neih theihna’n leh oil leh gas zawn hna tibahlah thei thil sawiho a, a chinfel dan ngaihtuah tul a tih thu a sawi. Thutkhawmah hian Directorate General of Hydrocarbons (DGH), ONGC, Oil India Ltd, NHIDCL leh Mizoram PWD bakah Commerce & Industries leh Geology & Mineral Resources hotute an tel.
ONGC leh Mizoram sawrkar chuan Kolasib, Mamit leh Aizawl district hmun thenkhata hma la turin September 2003 khan inremna thuthlung an ziak a. Meidum leh Zanlawnah lei verh a ni. Meidumah hian hydrocarbon hmuh a nih rualin, suma chantir turin duhthusamin a tha tawk loa, Zanlawnah erawh beisei ang hmuh a nih loh avangin hna hi kum 2020 khan an chawlhsan. Hortoki ah lei verh leh tum a ni a, DGH phalna nghah mek a ni.
Oil India leh Mizoram sawrkar chuan kum 2007 ah thawhhona ziakin Serchhip, Hnahthial leh Aizawl district hmun thenkhatah hma an la a. Maubuang, Keifang, Thenzawl leh Phulmawiah hmun 4-ah lei an verh a; Pangzawl-Thiltlang inkarah verh leh tum niin, hemi atan hian DGH phalna an la tawh a, 2022 February atanga January 2024 thleng phalna pek an ni.
Oil zawnna atan hian bungraw rit leh liantham tak tak thiarluh a ngaih thin avangin kawngpui tha mamawh a ni a. Mizoram PWD-in Bailey bridge an dawh lai chu chak zawka dawh zawh nise an ti. NHIDCL-in kawngpui siam hna a thawh mek pawh leiverhna tur hmun panna kawngpui chu zawh thuai a nih theihna’n ngaihpawimawh bikah nei se tia hriattir an ni.
Assam – Manipur – Mizoram state pathum intawhkhawmna ramri square km. 255 bial velah ONGC-in oil leh gas zawn hna a thawk mek bawk a. Mizoram lamah hian an beisei ang an hmuh mai theih loh avangin hna chawlhsan rih a ni a. Hmalak chhunzawm an tum dante tun thutkhawmah hian zawhfiah an ni.
Mizoram leilung chu state thenawmte aia muk leh laih har zawk a nih avangin hun a duh rei tih an sawi a. Oil leh gas zawn hi hun engemawchen an thawh hnu ah pawh tun thlengin beisei ang hmuh la ni lo mah se, data tam tak an lakkhawm theih phah a. Hei hian an zirchian zelna turah a pui dawn a. Oil India Ltd leh ONGC hian data inhrilhhre tawnin a hu hoa zirchian leh zual an tum tih an sawi a ni.