Kum 2028 Olympic-ah cricket telh tum
Cricket hi kum 1900 atang khan Olympic Games sport zingah telh a la ni lo a, mahse, 2028 Los Angeles Games-ah hian telh tura rawtna a awm mek.
Cricket game-ah pawh a reilo ber zawnga khelh mi Twenty20 cricket chu karleh mai hian International Olympic Committee-ah LA Games atana infiamna pakhat atan an chhawpchhuak dawn a, infiamna dang nen vote hmanga buk a ni ang.
Kum 2028 Games atan hian flag football an tih mai, insi rup rup lo zawnga American football khelh dan (a non-contact version of American football) bakah squash chuan an Olympic debut an nghakchhuak ve thei bawk a, vote lak huna duhtu an tam danin Olympic sport-a rinluh an nih leh nih loh a hril ang.
Los Angeles Games atana rawt dangte chu Paris 2024-a an lo hnawl tawh baseball/softball leh lacrosse-te an ni.
LA28 chairperson Casey Wasserman chuan Olympic-a telh tura an buk turte chu infiamna phurawm tak tak – US leh khawvel pum huapa in leh sikul hnung lam hmunawl, community centre, stadium leh park-a khelh mai theih chi an nih thu a sawi.
International Cricket Council chairman Greg Barclay pawhin vote theih tura chhawpchhuah chu final decision la ni lo mah se kum zabi khat chuang hnua Olympic leh cricket sawizawm a ni leh ta hrim hrim chu hmasawnna leh chhinchhiahtlak a nih thu a tarlang ve bawk.
Karleh hian Mumbai-ah Inter-national Olympic Committee mem-ber-te an kalkhawm dawn a, he hunah hian vote hmangin LA28-a belh tur infiamnate hi an tichiang dawn a, T20 men’s leh women’s tournament chuan LA Games-ah hian hmun a chan ngei a rinawm thu media liante’n an puang.
Kan hriat tawh thin angin, Games thlengtu khawpui hian Olympic programme-a telh tur an infiamna duh leh ngainat zawng an rawt thei a, Tokyo 2020 organising committee pawh khan surfing, sport climbing, karate, baseball/softball leh skate-boarding an rawt a, pawmsak an ni.
Olympic-a circket telh a nih awmchhun chu kum 1900 daih tawh kha niin, Paris khawpuiin Olympic Games a thlen tumin inelna chi hrang 18 lek zinga pakhat a ni a, final-ah Great Britain hneh loin France an tlawm a; Netherlands leh Belgium an inhnuhdawh avangin kha final match kha khami kum Games-a cricket match thlir tur awmchhun a ni zui ta nghe nghe!
India, Pakistan, Australia tih vel an lan hma 1900 Raris Games-ah khan team pakhata tunlaia player 11 ang loin player 12 an awm a, Test format-a khelh ni mah se ninga khel loin ni hnihah an zo thung.
Great Britain tana inlante hi Devon leh Somerset Wanderers team player-te niin, French team hi Paris khawpuia British citizen khawsate an ni hlawm!
Kum 2028 Olympic-ah cricket telh tum
