Inrinni zan Copa del Rey final penalty shoot out-ah 4-2-a Mallorca hnehin Athletic Bilbao chuan kum 40 zet an lo nghah tawh trophy an hlawhchhuak.
Bilbao hian final an luhna kawngah Spanish heavyweight pahnih Barcelona leh Atletico Madrid hnehin, a zawn zata Copa del Rey final vawiruka an tlawm hnuah champion boruak an lawm ve thei ta hram a, an club chanchina Copa del Rey title 24 an lak tlinna niin, kum1984 hnu lama a vawikhatna a ni thung.
Inrinni final hun pangngaiah team pahnihin goal khat ve ve tilutin, goal hmasa zawk hi first half minute 21-a Dani Rodriguez-a’n Mallorca hmahruaina a tihluh a ni a, corner atanga ball thlawkchhuak chu Athletic defender-te’n an tibuai zo lo a, Rodriguez a langsar ta a ni.
Table-a 15-na luahtu Athletic Bilbao lamin tualchhung league La Liga lama top four luah phak an tum mek laiin an champion theih tlat lohna, final-a an tlawm zelna Copa del Rey hi an target lianah an khung lo thei a, kum liamtaho ang bawkin kuminah pawh an chak zo lo leh nge nge dawna ngaihna a lian hman a, half-time hma lawka Nico Williams-a goal tur offside vanga hnawl a nih hnu phei kha chuan an vanduaina la kaltluang zel tura ngaihna a piang lo thei lo.
Second half tir lam minute 50-na a kal mek laiin Oihan Sancet chuan khel tha tak Williams-a thawhrah atangin Bilbao siphurh a sut a, hun pekbelhah pawh goal dang a luh zawh tak loh avangin penalty pet hmangin chak zawk an zawng a, Alex Berenguer lo penchhuak chuan Seville khawpuia 4-2-a Athletic Bilbao chakna goal hlu bik a chhuihlut a, Barcelona hlui Ernesto Valverde hnuaiah trophy kuah chunga nuihna hun tha an tan a herchhuak ve ta nge nge a ni.
La Cartuja stadium chhung thutna awm zawng zawng an luah khah vek zan inkhelah khan he competition-a Athletic natna ngai bawk kha kan hmuh chhunzawm leh teuh hle a, a tawpah erawh nuih ni hmel an hmu ve leh ta nge nge a, vawi 31 champion tawh Barcelona tih lohah chuan Spain rama club upat indawt dana palina ni pha Athletic hi Copa del Rey trophy kawl hnem ber an ni.
Kum 40 hnua champion Bilbao
