Daily Newspaper

Kum 40 hnuah Guinness-in Shakuntala Devi record siam an pawm

21

Human Computer an tih mai Shakuntala Devi chuan June ni 18, 1980 khan Imperial College London, UK-ah number digit 13 pahnih inpuntir chu second 28 chhungin engmah hmang loin a chhut chhuak hman a, hei hi Guinness World Records chuan mihring zinga thil chhut chak ber record-ah a puang thar.

Issue hmasa lama a chanchin behchhana film an siam kan rawn tarlang tawh Shakuntala Devi record siam entirna certificate hi a fanu Anupama Banerji’n a dawng a, a nu-in he record a siam lai hian Banerji hi chu kum 10 mi vel chauh a la ni.

Shakuntala Devi hian mathematics chawh nan khawl a mamawh ve lem lo a, belh leh paih leh puntir bakah sem te chu eng anga number tam pawh calculator hmang miah loin second reilote chhungin a chhut chhuak zung zung thei a, hei vang hian ‘human computer’ te pawh an lo tihial a ni. Imperial College London-ah hian a hmunah number digit 13 nei pahnih an thlan chawp chu a inpuntir chhuak second 28 chhungin eng hmanrua mah hmang lovin a chhut chhuak hman a, chu chu kar liamta khan Guinness chuan record-ah an puang thar ta a ni.

Shakuntala hian June ni 18, 1980-ah puntir lamah a thluak that zia entirin, digit 13 number pahnih puntir tur, Computer Department of Imperial College London-in an thlan chawp sak chu dik takin a chhang thei. Hemi tum hian 76,86,36,97,74,870 X 24,65,09,97,45,779 an zawt a, chung number pahnih puntir chhuah chu chhang dik thlapin a chhanna chu 1,89,47,66,81,77,99,54,26,46,27,73,730 a ni.
Shakuntala Devi hi November ni 4, 1929 khan Bangalore-ah a piang a, April ni 21, 2013 khan, kum 83 mi niin a thi ta a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy