Kum 40 tling World Cup khel tur zingah Dzeko…
Germany rama an second tier club Schalke tana khel mek Manchester City striker hlui Edin Dzeko chu kan hma lawk Fifa World Cup 2026 khel tur Bosnia-Herzegovina squad la thlitfim leh turah telh a ni a, ram tan he tournament-ah hian a inlan a nih chuan kum 40 leh a chunglam kai chho tawh World Cup khel player tlemte zingah a hming nemkai a ni ve tawh ang.
Cameroon forward hlui Roger Milla khan a kum 40-na birthday a lawm hnuah 1994 tournament a khel a, tun thlengin outfield player zinga kum 40 tling chunga World Cup khel thei a la ni ta zel rih.
Goalkeeper-te hi outfield player-te aiin an daih rei zawk tlangpui a, kum 40 leh a chunglam kai tawh chunga World Cup khel pha dang parukte pawh goal-veng vek niin, chu’ng mite chu – kum 45 mi ni chunga 2018 World Cup khel Essam el Hadary (Egypt), bakah Faryd Mondragon (Colombia), Pat Jennings (Northern Ireland), Peter Shilton (England), Dino Zoff (Italy) leh Ali Boumnijel (Tunisia)-te kha an ni.
Kumin hian outfield player zinga kum 40 tling chin World Cup-a inlan beiseiawm ve dangte chu kum 40 mi Croatia captain hlun Luka Modric leh Portugal captain kum 41-a upa ni tawh Cristiano Ronaldo-te niin, kum 40 tling ve chiah Mexico veteran goalkeeper Guillermo Ochoa beisei a ni bawk.
Ram tana match 148 khel tling tawh Dzeko hian qualifying khelh lai khan Bosnia Group H match riat zinga match sarih a khel a, play-offs kaltlanga an tlinna kawngah semi-final leh final match a khel bawk.
Last four match-a Wales an hneh tumin ram tana a goal 73-na a thun Nghe nghe.
Bosnia hi 2026 World Cup khel tur team 48 zinga 26-man squad thlang chhuak hmasaber ram an ni a; kumina United States, Canada leh Mexico-te inthlentawm tur hi World Cup-a an inlan vawi hnihna tur niin, Group B lamah a thlengtu pakhat Canada, Qatar leh Switzerland-te nen an awmho.
World Cup khel tur Bosnia squad
Goalkeepers: Nikola Vasilj (St Pauli), Martin Zlomislic (Rijeka), Osman Hadzikic (Slaven Belupo)
Defenders: Sead Kolasinac (Atalanta), Amar Dedic (Benfica), Nihad Mujakic (Gaziantep), Nikola Katic (Schalke 04), Tarik Muharemovic (Sassuolo), Stjepan Radeljic (Rijeka), Dennis Hadzikadunic (Sampdoria), Nidal Celik (Lens)
Midfielders: Amir Hadziahmetovic (Hull City), Ivan Sunjic (Pafos), Ivan Basic (Astana), Dzenis Burnic (Karlsruher SC), Ermin Mahmic (Slovan Liberec), Benjamin Tahirovic (Brondby), Amar Memic (Viktoria Plzen), Armin Gigovic (Young Boys), Kerim Alajbegovic (RB Salzburg), Esmir Bajraktarevic (PSV Eindhoven)
Forwards: Ermedin Demirovic (VfB Stuttgart), Jovo Lukic (Universitatea Cluj), Samed Bazdar (Jagiellonia Bialystok), Haris Tabakovic (Borussia Moenchengladbach), Edin Dzeko (Schalke 04)