Kum 5 chhungin lirthei chetsualnaah 30 an thi
Serchhip district-ah tun kum 5 chhung khan lirthei hrang hrang chetsualnaah nunna chan mi 30 an awm a, 33-in hliam an tuar.
Thawhlehni khan Serchhipah Road Safety Month chu district bawrhsap Paul L Khuma’n a hawng a. Lirthei khalh fimkhur loh vangin mahni leh midang tan chhiatna rapthlak a thleng thei a ni tih hria a, Road Safety Month denchhenin fimkhur taka lirthei khalh a tul tih hre thar turin mitin a chah.
Serchhip District Police chhinchhiah chinah, kum 2020 atanga January 2025 thleng khan an district-ah two wheeler chetsualna vawi 8, three wheeler vawi 1, LMV vawi 11, truck chetsualna vawi 9 a thleng a. Heng chetsualna avanga nunna chan 30 awmin, hliam tuar 33 an awm a ni.
Road Safety Month hawnnaah hian traffic rules zawm pawimawhna leh vehicle insurance chungchang sawifiah a ni.
Road Safety Month hi kum dangah chuan Road Safety Week anga hman thin a ni a. Mizoram State Road Safety Council chuan February thla pum hi Road Safety Month atan hman nise tia a rel angin, Serchhipah pawh February 1 atang khan hman tan a ni. Road Safety Month neih chhung hian Transport department leh Traffic Police chuan No Tolerance Month an hmang ve nghal a, lirthei khalhtuten dan an zawm leh zawm loh khauh takin an vil dawn a ni.
Kum 5 chhungin lirthei chetsualnaah 30 an thi
