Site icon The Aizawl Post

Kum 5 chhungin Mizoramah foreigner lut 3000 chuang

Tunhnai kum 5 chhungin dan ang thlapa Mizorama ramdang mi lut 3907 an awm a. Nikum, 2022 khan an tam zual.
Mizoram Police CID (Special Branch) hnuaia Foreign Registration Officer office chhinchhiah danin, tunhnai kum 5 chhunga Mizorama ramdang mi lo lut hi, Covid hrileng kum – 2020 khan an tlem zual hle a, hrileng ziaawm hma 2021 pawh khan lut an la tlem a ni.

Hrileng a ziaawm a, kum 2022 ah chuan ramdang mi Mizorama lut an tam chho hluai a, tunhnai kum 5 chhunga an tam ber tum niin, mi sang chuang an ni.

The Aizawl Post thudawn danin ramdang mi lo lut zingah hian Zohnahthlak unau, Chin/ Lai, ramdang khua leh tui, a bikin USA atangin rawn kal an tam nia sawi a ni a. A chhan pakhat zingah, Myanmar atanga Mizorama Chin raltlante ngaihvena rawn kal an tam tih sawi a ni.

Heng ramdang mi chhinchhiah zingah hian tunhnaia ramchhung buaina avanga Mizorama raltlan, Myanmar leh Bangladesh Zohnahthlak, ramri kana rawn lut te erawh an tel lo a ni.

CID (SB) hnuaia FRO office hotute sawi danin, ramdang (foreign) atanga Mizorama lut/ zin hi an lo chhinchhiah thin a. Dan angin he office ah hian anmahni leh an nihna kimchang hriattirin an inziaklut a, anmahni ngei registration leh visa chungchang buaipuiin an kal a ngai thin. 2019 June atang kha chuan India sawrkarin dan thar siamin, office kal kher ngai loin online hmangin awlsam takin an in-register thei tawh a. A hma angin an ni office kaltlang khera thil tihfel ngai thin kha tunah chuan a ngai kher ta lo tih an sawi.

Mizorama lokal ramdangmi khualzin tam berte hi an chhungte leh thiante tlawh tura rawn zin an ni a, khualzin pangngai leh hna chungchanga rawn kal an awm nual tih an sawi.

BOX
Ramdangmi (foreigner) lut zat:

2018 - 818
2019 - 936
2020 - 312
2021 - 573
2022 - 1268
Exit mobile version