Kum 5 chhungin Mizoramah kawphetha megawatt 50 tal siam hman an tum a, an peih hman lo a nih pawhin an pelh thui a ring lo tih chief minister Lalduhoma chuan a sawi.
Power megawatt 24 siamchhuak thei tur Tuirini Small Hydro Electricity Power Plant dinna tur lungphum chu Thawhtanni khan chief minister hian Tuirini kamah a phum a. He power plant dinna tur hi kum 2016 khan Congress sawrkarin bul a tan a, kum 2019 ah MNF sawrkarin a chhunzawm a, sum neih loh chhuanlamin a bawhzui leh ta lo niin a sawi.
ZPM a sawrkar hnu, 2024 February an tinung thar a, tih takzeta ti duh tan chuan a ‘process’ a a kal chak hle tih sawiin, “New Development Bank Sanghai atanga loan cheng vaibelchhe 676.98 hmanga gthawh tur a ni a, loan hi zaa 1.25 pung awmin kum 19 chhunga rulh tur a ni. Mizoram sawrkarin kan rulh ve tur hi sum puk atang hian zaa 20 a ni a, chumi atang chuan zaa 10 chu a pekin min la pe dawn zui a, kan rulh tur tak chu zaa 10 a ni. Loan thami a ni a, hetiang hi a tam thei ang ber puk kan duh. Contractor, supplier leh health care bill leh power bill bat, GPF bat tih ang vel ni lo khan,” a ti.
Sawrkarin Mizoramah company lianin industry dina rawn inbun turin ‘offer’ neiin an sawm a, chumi ah chuan power hi kan mamawh tam dawn tih chief minister hian a sawi a. Chutihrualin tualchhung mi entreprenuer tha tak tak an tam tual tual bawk nen, power-a intodelh chu a tul hle tih a sawi a ni.
Power leina atan hian thla khatah cheng nuai 4877 vel pek reng a ngai a, kum khatah nuai 58547 pek a ngai tih a sawi a. National grid atanga kan quota neih sa pela kan eng chhit man pek belh zel a ngai bawk a, kum 2025 chhung khan kan quota pelin Mw 75 kan hmang a, heta kan pek ngai hi nuai 7560 an seng, tiin a sawi bawk.
“Intodelh loh hi a pawi a, India sawrkarin regulation a rawn siam har zel a, power-a intodelh lo state hi kan phur a rit tual tual,” Lalduhoma hian a ti.
Union territory nih atanga state nih hnu, kum 54 chhungin Mizoram-in a pualin power Mw 10 vel bak a la siamchuak loa, ZPM sawrkarah chuan kum 5 chhungin a tam thei ang ber tharchhuah an tum tih a sawi. “Kum 5 chhungin mw 50 kan peih hman loh pawhin kan pelh thui ka ring lo,” a ti.
ZPM sawrkar hnu ah Power & Electricity department chu a hmaa ‘Sumthuni Nu’ ang deuha ngaih chu, power bill pek that vang leh rebate hmu thei khawpa an chet that avanga power trading-a an hmuh atanga an hlepah cheng nuai 9379 vel a tling tawh a, state sawrkar tan revenue hmu tha department a ni der tawh tih chief minister hian a sawi.
Tuirini Small Hydro Electricity Power:
8 2024 February 5 khan P&E department chuan externally aided project (EAP) hnuaia thun turin state sawrkarah proposal a thehlut a. State Level Screening Committee chuan 2024 April 4 khan ngaihtuahin a pawm a, sawrkar laipui Department of External Affairs (DEA) Screening Committee chuan 2025 February 28 khan external funding turin a pawmpui.
8 New Development Bank Shanghai-in a funding tura tih a ni a, project cost 80% hi loan angin NDB atangin lak a ni anga, sawrkar laipuiin a rul ang. Project cost atanga 20% hi state sawrkar tum ve tur a ni. Total cost of project hi vbch. 676.98 a ni.
8 Hna hi kum 5 chhunga zawh tura duan a ni a, power house-ah hian megawatt 12 pe chhuak thei khawl pahnih, an pahnih belhkhawm Mw 24 tling tur bun a ni ang.