1936-a piang a ni a, kumin hi a kum 90-na a nih chu. Thing a la phur peih a, tui a la chawi peih. A la inkhawm peih a, 2025-ah pawh khan Sunday School vawi khat chiah a kai lo.
Lianbuli a ni a, Khawhai khaw nu a ni. Khawhai khuaa kohhran hrang hrangte’n kum thara an hna hmasa ber chu Lalpa tan tiin an hnatlang thin a, kumin January thlaa hna hmasa ber atana kohhran mipuiin thing an phurh pawhin thingpui lumin a hnatlang.
“Hnathawh chu nuam ka ti lutuk. Ka awm a’n nawm loh deuh te pawh hian ram kal ila ka dam mai ang ka ti a, hna kan han thawk bawrh bawrh a, khawsik te pawh a reh mai,” a ti.
“Hnathawh hi chu a nuam… hna kan han thawk a, kan taksa a chet vel te hian kan insawizawi a ni mai. Hna ka thawh loh chuan taksa a khawng a,” a ti bawk.
Thing a la phur peih a, “Dai hnaiah a tang te te chu ka la kuai ve tawk tawk,” tiin a sawi. Tui a la chawi peih a, eirawng a la bawl peih bawk. Puan te pawh a la bang peih a, puan banpui turin an la sawm thin. January ni 21-ah pawh khan puan hi bu hnih a bang.
A nulat lai pawhin hna a thawk nasa a, “Ka pa hova lo kan neih lai te chuan buh hi mautlawn zawn te kan thar thin. Kan chhek in te chu hmeithai in tiat alawm,” a ti.
“Mizovin hna kan thawk nasa, kan taima,” a ti a, “Hmeichhiain nau kan neih pawhin nau lai a dam chuan kan thawk leh mai a,” a ti. Nau lai dam hun hi thla khat vel a ni.
“Kum 15 kan nihin hlo kan thlo tawh a, zingah buh kan deng a, chhunah kan feh a, zanah la kan kai leh bawk a. Kein kan kal nasa a, chu chu Mizo nun a ni a,” tiin a sawi zawm a ni.
|hangthar an taima lo ang tih a hlau a, “|hangthar hi an hahdam em mai a,” tia sawiin, “An hnathawk te hi an hahdam, kein an kal si lo. Buh thar se, hlawhfain ran an phurhtir a, tunlai mi chu an hahdam. Inkhawmnaah pawh lirtheiin an kal a, a upa pa hi kein kan kal a,” a ti. “Mizoin hna kan thawk nasa a, kein kan kal a, chu chu kan thatpui alawm,” a ti bawk.
An vanglai a ngai a, lo an neih lai, duhtawka hna an thawh lai a ngai thin. “Kan chul hlui te hi ka thlir ka thlir thin,” a ti a, “Hlo thlawh te hi a nuam a, thlai kan han ching a, a lo to te hian kan hlim em em mai a,” a ti.
Lianbuli hi 1958-ah Kaphranga nen an innei a, fa 12 a hring. Awm mai mai a tum lo a, “Ni tin hian rei lo te tal hnathawh ka duh. Hna kan thawh loh chuan kan ruh te hi a khawng a. Hnathawh vanga hrisel kan ni,” tiin hnathawh a fak.
Chak tawh lo a inti a, thing pawh fak 20 phur zo tawh lo a inti. “Kan nulat lai te chuan fak 25 te kan phur alawm,” a ti.
Tun thlenga hna a la thawh theih avangin a lawm a, “Pathian malsawmna a ni ka ti tawp mai. Pathian zarah ka hrisel alawm kei chu,” tiin Pathian chunga a lawm thu a sawi.
Kum 90 miin hnathawh nuam ti
