India-a zaithiam (playback singer) hriat hlawh ber pakhat, Asha Bhosle chu Pathianni chawhnu khan Mumbai-a Breach Candy Hospital-ah kum 92 mi niin a thi a, a fapa, Anand Bhosle pawhin a nu thih thu hi a puang tawh.
“Ka nu hi vawiin khan a boral a, naktuk zing dar 11-ah mipuiin a chenna, Casa Grande, Lower Parel-ah zahna hnuhnung an hlan thei dawn a, a hun hnuhnung ber chu tlai dar 4:00-ah Shivaji Park-ah neih a ni ang,” a ti.
Bhosle hi Zirtawpni khan zan khan damdawi inah dah a ni a. A tunu, Zanai Bhosle-i chuan a hmain X-ah ‘a chauh vang leh a awma harsatna’ a neih avangin damdawi inah dah a nih thu a tar lang bawk.
Indian music-a hriat hlawh ber zinga mi, Bhosle-i hian kum 1943-a Marathi film Majha Bal hmangin a playback career a tan a. Kum tam tak chhungin hriat reng hlawhtawh tur hla lar tak tak, ‘Chura Liya Hai Tumne Jo Dil Ko’, ‘Do Lafzon Ki Hai Dil Ki Kahani’, ‘O Haseena Zulfonwale Jane Jahan’ leh ‘Ye Ladka Hay Allah Kaisa Hai Diwana’ te a sa a. Indian leh hnam dang tawng 20 velin hla a record a ni.
Kum tam tak chhung hian hla phuah thiam lar tak tak – R.D. Burman, O.P. Nayyar, Ilaiyaraaja, Bappi Lahiri, leh A.R. Rahman te a lo thawhpui tawh a. Kum 2006 daih tawhah khan hla 12,000 vel a record tawh thu a sawi a ni.
Bhosle-i hi kum 2000 khan Dadasaheb Phalke Award leh kum 2008 khan Padma Vibhushan hlan a ni a, chawimawina dang tam tak a dawng tawh bawk.
Kum 92 mi niin zai thiam lar, Asha Bhosle-i thi
