Daily Newspaper

KUM DANG ZAWNG AIA THU AWIH

9

Zoremi Hmar Zote

Kan hre theuhin a rinawm. Kum dangah pawh hàlpuah leh hàlmawi lam chi reng reng zawrh leh lei, hàl khap a ni thin a. Krismas vuakvêtah chuan kan la insumin thu kan la awih a, kan la reh thiap thei thin. Mahse kum a’n rawn thar zet chuan veng hrang hrang, a vêng kêltil ber atanga Aizawl vêng lûn lai thlengin, ngawih hmak har kan ti ta thin a; a mawi tawk hian kan inchhâwn pawp pawp mai thin. Mahse kumin zawng, boruak a tihbawlhhlawh vang chauh ni lo, thu kan awih ngei ngei a tulna thil a awm ta tlat mai.

Chu thil tak maia chu ngaihtuahho turin kar hmasa lamah khan kan Home Minister Pu Lalchamliana hovin SAD Conference hall-ah meeting neih a ni a. Hàlpuah leh hàlmawi lam chi reng reng leh, silai lem, a mu kah chhuah theih chi te chu khap vek niin, puan êng thei, van lama kah chhuah chi(sky lantern) pawh, boruak chhia siamin boruak tibawlhhlawh lo mah se, kangmei tichhuak thei thil a nih avangin khap ni ve bawk rawh se tiin ro an rêl a. Kum dangah chuan hàlmawi chi hrang hrang hian boruak a tichhia a, kum upa lam tan thil tha a ni lo bawk nen, lungphu tha lo leh damlo na deuh tan te a tha lo bawk tiin khap a ni thin.

Kuminah erawh, hêng a that lohna tam tak bakah hian, kan hripui lêng vang hian thu kan awih leh zual ngei ngei a ngai! Covid 19 hian thâwkna lamah harsatna a siam thei tih kan hre vekin a rinawm a, lo chhawm nung zual tur, he hri kâi, vei mekte tana phur tirit zual tur chu kan siam loh ngam a tha ang. Kawng dangah he hri dona atan hian tih theih kan nei tlem hle mai a, kan hotute’n kan zavaia him nan, hri a darh zual loh nan leh vei mekte an dam khawchhuah nan ti a, uluk taka kan tana tha tura an rêl sa hi, lo zawm ve hram hram ila, khua leh tui tha nihna a ni mai; a kristian hle bawk.

Kan hnung lawk khan Hindu ho kûtpui, Diwali hman niin, Covid 19 kâi thar an pung hluai mai a. Boruak tibawlhhlawh zual thei hàlpuah leh hàlmawi chi hrang hrang an hàl nasat vang a nih rin a ni. Chu vang tak chuan kan ramah pawh hetiang hun harsa leh rapthlak hi kan tawh ve lohna turin, hri do kawnga kan pasaltha LLTF leh, tlawmngai pawl YMA ten lungrual taka thawh ho va, he hripui laka kan ram humhim hi an tum ruh hle a. District capital tina DC-te hnenah he khapna dân khauh tak mai hi tichhuak tura hriattir an ni dawn bawk a ni. Kum dang ang mai maia palzam a nih lohna turin, kan ram hruaitute leh mi tlawmngai ten hma an la a, an phe suau suau mêk; thlâ an va timuang êm!.

He krismas leh kum thar vuakvetah hian police-ten check post siamin ngawrh taka beihpui thlak an tum a. State pawn atanga lak luh a nih lohna turin lirthei an lo check zel dawn bawk a, online-a lo chah hrám tum tân pawh duh ang ngawtin an che dawn lo a nih hmel; awi, lo che thei pawh ni ula ti lo hram mai teh zawk u, a zahthlak; chaw in nghei phah lovang. He hri hian min luh chilh nasat tawh avangin, hri kâi tur kan dang thei lo a nih pawhin a darh tur erawh ven hram hram an tum fan a, a hlawhtlinna chu keini mipuite-ah hian a awm lawi si a ni. An thawhrimna leh ram leh hnam an hmangaihna hi, favai thliin a len bo ang lekah chantir suh ang u khai.

Ram damna atana inpe ten hah taka kan ram an vên laiin, thu awih lo fâl emaw, dân bawhchhiaa lo tilui tálh kan awm a nih chuan a zahthlak khawp ang. Kan tan, in tan, i nupui fanau, i pasal fanau, i nu leh pa leh i hmangaihte zawng zawng an him nan khan a nia, a thim a vâr thlu lova an thawh chhuah ni. Thlasik khaw vawh vànglai taka nupui fanaute kiang a, lum nuam taka awm chu tuin nge thlahlel lovang ni!

Ka hriat theih chinah, biak in ngeia krismas kan hman theih loh vawi khatna tur niin ka hria a. A chhan sawi a ngai lo, kan hre vek. A thlirna tlâng danga han thlir phei chuan mi a runin rilru a na vawng vawng thei hial a ni. Kawng lehlamah chuan krismas hlutzia, biak in ngeia Lal thar lo piang chibai bûk theih a lo hlutzia te kha min hriat chhuahtir a. A pui a nawia ruai theh tura sande sikul lam pan a, kan fa ten kan puan tlâng an pawh dàr dár lai te, vawt tih vanga kal kun deuh hlo chunga kawmchhak pathlawiin, kâi phelh phawlha chaw a dawh nguan nguan pawhin mitthlaa lan an tîm lo! Thleng thei tura kan ngaih loh, mumangah pawh kan la man loh thilin min nang ta chu a ni si a, a hrehwm mang tak e!

Kâr khata vawi thum tal emaw, a aia tam pawh sa hmeh thei kan tamin ka ring. Mahse krismas ruai kher hi a tui bik a ni tiraw! Mahni ina kan ei zât pawh ei a har thin a, sa ni se in lama uluk em ema kan siam, bawlhlo tin nena kan suasam a tluk na hek lo, mahse masi ruai chu ‘Masi ruai’ a ni miau a, masi ruai theh thei tura kan nunna zuaha a awm avang leh, hriselna min petu hnena lawmthu sawi mawlh mawlh chunga masi ruai theh kha, kha ber mai kha a hlû a ni. Kum tharah, he hri hi Lalpa’n min lak kiansak tawh ngei ang a, hlim takin kum dang ang bawkin, mahni lawina kohhranah theuh masi ruai hi kan la theh leh ngei turah ngai ila, beisei ila, dil ila, tawngtai zel ang u aw. A pawimawh ber chu thu awihna a ni kan tih tawh kha.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy