Kum hmasa aiin boruak thianghlim – MPCB

Kum hmasa aiin boruak thianghlim – MPCB
Kum 2023 thlahna aiin kum 2024 thlah zanah boruak bawlhhlawh a tlem zawk a, chutihlaiin Aizawl bik boruak chu a kum telin a bawlhhlawh ve hret hret hrim hrim nia a lan thu sawi a ni.
Mizoram Pollution Control Board chuan kum 2024 thlah zan boruak dinhmun a zirchianna a tihchhuahah Sikulpuikawna Continuous /Automatic Air Quality Monitoring Station-in boruak dinhmun chhinchhiah atanga a landanin, 2024 kumhlui thlah zanah halpuah leh halmawi halin kum hmasa lam aiin boruak a tibawlhhlawh nep deuh tih a lang. Air Quality Index (AQI) hi 2024 December 31 chhun lamah chawhrualin 52.9 a ni a, zan dar 12.00 – 1.00 inkar, halpuah hal vanglaiah chuan 115 a kai a, chutih rualin kum kalta 2023 zan dar 12.00 – 1.00 inkarah khan AQI hi 597 a ni tih a sawi.
‘Kum 2023 aiin kum 2024 hian halpuah hal vanglai, zan dar 12-1 inkar chhûngin AQI hi a let 5-in a tlahniam tihna a ni. Mipuiin boruak tha nei zel thei tura sawrkar hmalakna thlawp kawngah hma kan sawn a, kum hmasa lam aiin halpuah leh halmawi kan hal nasa lo niin a lang,’ a ti.
Boruaka bawlhhlawh nawi leng zinga tê zual leh hauhawm zual, taksa chhungril chuap leh thisena kaltlang thei (PM 2.5 ) pawh 2024 December 31 chhunlamah 6.5 µg/m 3 bawr a nih laiin zan dar 12-1 inkar, halpuah hal vanglaiah chuan 25.74 µg/m 3 a kai chho tih a sawi a ni.
Halpuah hal vanglai hian chhun lam nen khaikhinin a let 4 chuangin bawlhhlawh nawi a pung tihna a ni. Chutih rualin kum 2023-a 290.2 µg/m 3 aiin kum 2024-ah hian a let 11 chuangin a tlahniam a ni.
December 31 chhunlam boruak leh halpuah hal lai boruak khaikhin chuan, halpuah hal vang hian boruak a bawlhhlawh phah tih a lang a; Air Quality Index stage 6 zingah a laihawl – stage 3 (moderate) a kai pha tho a ni. Thâwk lama harsatna neite tan a la hlauhawm pha tihna a ni tih MPCB hian a sawi.
‘Zirchianna atanga a lan danin, December ni 31 zing dar 6 leh tlai dar 6 inkar AQI chu kum 2023-ah 13.13 a nih laiin kum 2024-ah erawh 52.9 a ni. Hei hian a entir chu, Aizawl boruak hian a kum telin bawlhhlawh lam a pan ve zel tihna a ni,’ a ti.