Kum hnih ‘advise’ a dawn hi
duhtawk tawh turin kan ngen
– AAP Mizoram
Kalphung thara kal an intiam angin adviser panga nei chief minister chu kum hnih chhung ‘advise’ a dawn bak chu duhtawk tawh turin an ngen tih AAP Mizoram chuan an sawi.
Aam Aadmi Party hruaitute chuan, ZPM chu an intiam ang ngeiin kalphung thara kal turin an beiseiin an phut a. Sawrkar hmasa atang tawh a chin than em em, party mi duhsakna uchuak chhawm ve zel lo turin an ngen tih an sawi.
Board hrang hrang – ZOHANDCO, MIFCO, MAMCO adt. chairman atana party hruaitute ruat leh hamthatna tam tak pek leh a kaihhnawih avanga sawrkar sum tam tak luangral thin chuan ram hmasawnna a thlen loa, kum hnih chhung an kalpui chu duhtawk tawh a, a rang thei ang bera heng Board chairman hi ban turin an phut a, sawrkar hnathawk mithiam emaw thalai hna neilo emaw merit list-a dah zawk turin an ngen tih an sawi a ni.
Chief minister Lalduhoma chu Mizoram history-a adviser mamawh hnem ber a ni, tiin, kum hnih chhung advise a dawn tawh chu ram leh hnam tan finna khawp a dawng turah an ngai a, adviser 5 em em neih a tul tawh loh an beisei tih an sawi a. Heng avanga sum luangral thin chu mipuiah luangchhuak ve tawh se an ti tih an sawi.
Zawhna chhangin, state dang CM chuan adviser an nei a nih pawhin heti zat zat an ni ngai lo tlangpui a, mipui thlan (MLA) an ni deuh zel bawk a, tuna CM adviser zingah chuan mipui thlan pawh ni lo an tel tih an sawi bawk.
Kum hnih ‘advise’ a dawn hi duhtawk tawh turin kan ngen
