Kum hnih hnua kirleh tum Pogba
Manchester United player hlui Paul Pogba chu damdawi hman phal loh zinga mi dehydroepiandrosterone (DHEA) a hmang trih manchhuah a nih hnuah kum li chhung atan hrem a ni a, kum 2023 September thla atang khan tun thlengin competitive match a la khel leh ta lo a, mahse, a chunga hremna hi a khinlet hnuah Court of Arbitration for Sport chuan hremna hi thla 18 laiin a pawhtawisak ta a, hei vang hian kum hnih a chawlh hnuah khelmual a lut hnai dawn niin a lang.
He thu lo rikchhuah chhan pawh hi AS Monaco manager Sebastien Pocognoli tawngkam atangin a ni a, nikum June thlaa free transfer-a an sengluh French midfielder Pogba chuan a club thar tan debut a nghakchhuak dawn hnai tih a sawi.
Juventus leh Manchester United player hlui hian hremna a tawh avangin Ligue 1 club Monaco a zawm hnuah a club thar tan a la kel lo hrim hrim a; Thawhlehni khan an midfielder thar an chhawr hnai dawn tih sawiin Pocognoli chuan, “Tun dinhmunah thil a kal dik chho zel a, squad-a a kirleh hun tur hi a hla ta lo e. A lo kir hunah chuan player a nihna zawna kan chhawr theihna tur leh a tangkai theih dan tur kan zirchiang hmasa phawt dawn a ni.
“Manchester United tana a khelh tawpna leh Juventus-a a hun hmante kha a lo hla ve duai tawh a; chubakah chuan player zawng zawngte hi an kum leh tawnhriat nena sawizawm loh theih an ni lo a, chu’ngte a nih avang chuan a kum leh background enin squad-a a dinhmun tur hi kan ngaihtuah dawn a ni,” tiin kum 32 mi ni ve tawh Pogba chungchang a sawi a, first eleven a chang nghal dawn tih lam a lang rih lo!
Monaco hi Ligue 1 table-ah parukna ni mekin, nizan result tarlan hman lohah Nantes n hmachhawn a, an chak chuan Pogba an chhawr thei dawn hnai nen league lamah pawh an phur thar chho ngeiin a rinawm.
Kum hnih hnua kirleh tum Pogba
