Kum kalta, 2023- 2024 chhunga Directorate of Geology & Mining chuan chhiah leh fee chawi ngai hrang hrang an khawnkhawm atangin state sawrkar sum bawmah cheng nuai 1200 chuang an chhunglut a, hei hi kum khat chhunga sawrkara an la chhunluh tam ber tum a ni.
Commerce & Industries department hnuaia Directorate of Geology & Mining (DGM) bultumin 29th State Geological Programming Board (SGPB) thutkhawm chu Thawhtanni khan Aizawlah neih a ni a. Heta report danin, sawrkar kum liamta 2023- 2024 chhung khan DGM hian sawrkar sum bawmah minor minerals (lung, balu adt) atangin non-tax revenue Rs. 11,25,69,183 an chhunglut a; Petroleum Exploration Licence (PEL), fee atanga an hmuh Rs. 1,24,99,890 leh laboratory testing fee Rs. 4,22,080 chhunglut bawkin, a vaiin Rs.12,54,91,153 chu Mizoram sawrkar sum bawmah an chhunglut.
Hei hi Geology & Mining-in Mizoram sum bawm a sum chhunluh tam ber a la ni a. Hetih lai hian DGM chhungah Mizoram pum enkawltu thawktu nghet 48 awmin sanctioned post chu 86 a ni.
Kum 2023- 2024 chhung hian DGM hman tur dan thar pahnih – The Mizoram Minor Minerals [Concession & Prevention of Illegal Mining] Rules 2023 leh The District Mineral Foundation Rules of Mizoram 2023 te chu State Legislative Assemby-a pharh a nih hnu ah gazette notification-a chhuah niin, hman mek a ni.
He thutkhawm hi kumtin neih thin a ni a, Geology & Mining bakah Geological Survey of India (GSI) leh state chhunga an service mamawhtu (line department) hrang hrang heng – deputy commissioners/ District Disaster Management Authority, ONGC, Oil India Ltd., PWD, BRTF, Central Water Commission, AMC, UD&PA, DM&R, Land Revenue & Settlement bakah department dang – EF&CC, Finance, Planning, PHE, Mizoram University leh Pachhunga University College-a Geology department hotute an tel.
Kum kalta, 2023- 2024 chhunga DGM leh GSI (Tripura- Mizoram Circle) hnathawh hrang hrang report a ni a. Nikum lama SGPB thutkhawma agenda pass tawha hmalakna leh kum kal mek 2024- 2025 chhunga hnathawh tur chhawp sa sawihoa pawm a ni.
Kum kaltaah Geology & Mining-in sawrkarah nuai 1200 chhunglut pha
