Kum khat chhungin Aizawl West-II bial tan nuai 4500 sawrkarin a dah – Lalnghinglova Hmar

Kum khat chhungin Aizawl West-II
bial tan nuai 4500 sawrkarin a dah
– Lalnghinglova Hmar
ZPM sawrkar chuan kum khat a sawrkar chhungin Aizawl West-II bial tan hmasawnna hna thawhna tur cheng nuai 4500 sawrkarin a dah hman a, sawrkarin a duat hle tih he bialtu MLA, minister Lalnghinglova Hmar chuan a sawi.
Thawhtannia Aizawl West II biala ZPM local council candidate-te inhmuhkhawm leh infuihnaah bialtu MLA chuan, Tuikual South atanga Dinthar thleng kawngpui thar sial turin sum pek an ni tawh a; Tuikual lui kam tluanin kawngpui an nei dawn tih a sawi. Local council inthlan zawh veleh tender chhuah a ni anga, January 7-a State Level SASCI meeting-ah report pek niin, he kawngpui hi ‘Aizawl West Outlet’ tia hming vuah a ni a, administrative approval leh expenditure sanction hmuh a ni tawh a, cheng vaibelchhe 20 dah a ni tih a sawi.
“Kawngpui siam zawh a nih rualin Tuikual leh Dinthar veng mawng ber berte chu kawngpui lian kama cheng in ni tawh ang. Kuminah hna kan tan dawn. MLA inthlan dawn khan campaign auhlaah min intiamtir in tum thin kha a ni a, kan intiam duh loa, a takin kan tihlawhtling thung dawn a ni,” a ti.
Aizawl tlak lam mipui zawng zawngin an chhawr tur Vaivakawn Bazar sakthatna tur sum a lo thlen tawh thu leh local council inthlan model code of conduct-in a phuar loh ruala tender kalpui tura sawrkar a inpeih thu Lalnghinglova Hmar hian a sawi. “Kan beisei aia rangin Vaivakawn Bazar sakna sum a lo thleng hi kan lawm takzet a. December 6 khan sawrkar laipuiin SASCI hnuaiah cheng vaibelchhe 300 min pe a, chumi zingah chuan Vaivakawn Bazar sakna atan cheng vbch. 25.35 dah a ni. Restricted tender hmangin a thawktu tur PWD-in an thlang dawn a, thawh zawh thuaia utilisation certificate pek zung zung tul a nih avangin Committee meeting chuan rang taka kalpui a tum,” a ti.
Tunah hian Vaivakawn to Mizoram University kawngpui siamthat hna thawh mek niin, a chhe zualpui hnawhmam zawhah chhah tha taka bituminuous concrete hmanga chhun khah vek tur a ni a, hna hi zawh thuai tum a ni tih a sawi bawk.
Local council candidate-te chu politics a nih tak avanga insawichhiat emaw, mi dik lohna lam leh thawh that lohte en a tul ber lo, tiin, thil tha tih tur lam thlir turin a chah a; campaign-naah hawihawm leh inngaihtlawm a tul tih a sawi a ni.