Civil Hospital Lunglei hmuna Trauma Care Facilities chu Health minister-in a hawn atanga kum khat chuangah pawh a takin hman theih a la ni lo tih Lungleia Congress Thalai chuan an sawi.
LDYCC thuchhuak chuan 2022 June 20 khan Health minister Dr R Lalthangliana’n Trauma Care Facilities hi ropui takin a hawng a, Civil Hospital Lunglei thuamchakna tur, rikrum thilah leh natna khirhkhan a hranpaa enkawl ngai bik a awmin chhimlam mipuiin Aizawl pan kher ngai loa level III Trauma Care Facilities building hawn chuan mipui mamawh a phuhruk an beisei laiin, building hawn a nih atanga kum 1 leh thla 3 dawn ral hnuah pawh chhawr theihin building luah a la ni loa, thawktu tur pakhatmah dah an la ni lo tih a sawi.
RTI zawhna chhan a nih danin, Lunglei Trauma Care Facilities sakna atan hian Congress sawrkar khan NEDP atangin cheng nuai 300 dahin, Ministry of Health & FW atanga nuai 81 hmuh nen, he building sakna atan hian a vaiin nuai 381 dah a ni tih a sawi.
Trauma Care Facilities hman a la nih loh chhan nia department-in a sawi chu, thawktu tur leh medical gas pipeline la bun fel loh vang a ni, tiin RTI zawhna chhan a ni a. A taka hman theih a ni lo chunga hawn a nih chhan hi an hriat bik loh thua chhan a ni tih a sawi.
NEC kaltlanga lei tawh khawl hrang hrang chu Trauma Care Facilities-ah hian a ngai ngaiin ground floor-ah dah a la ni tih pawh LDYCC hian a sawi.
Minister Dr R Lalthangliana vekin, kumin September 2-a Zonal Geology & Mining office a hawn pawh tun thlengin office thawktu awm lo leh office kalh reng ngai a la ni tih a sawi a. ‘Mimal hmingthat tumna leh mahni bial chauh ngaihtuah avanga thil tha awmsa chan zawng leh a taka hman mumal theih loh hmanga Lunglei mipui min hmatheh fo nana hman hi thleng tawh lo se, thil tha leh rotling hi a taka hman thuai theih nan sawrkar hian a rang thei ang bera hma la turin kan phut a ni,’ LDYCC chuan a ti.
Kum khat chuang hnuah pawh Trauma Centre hman theih lo
