Daily Newspaper

Kum khat hnuah CAA rules la peihfel thei lo

14

Citizenship (Amendment) Act, 2019 (CAA) Lok Sabha-in a passed hnu kum khatah Ministry of Home Affairs (MHA) chuan he dan kaihhnaiwha rules te chu ‘siam mek’ a nih thu sawiin rules tihchhuah a la nih loh avangin dan chu hman theihin a la awm lo a ni.

He dan sawihlawh tak leh December 2019 atanga kumin March thla thlenga nasa taka lungawilohna lantir chungchanga MHA-in official a sawi a neih hmasak ber a ni a. CAA vang hian Assam, Uttar pradesh, Karnataka, Meghalaya leh Delhi ah nunna chan 83 an awm phah a ni.

The Hindu chuan MHA hnenah hian CAA rules chungchangah Right to Information Act (RTI) hmangin dilna a thehlut a ni.

B.C. Joshi, Director (Citizenship), Foreigners Division chuan RTI chhanna a pekah ‘Citizenship (Amendment) Act, 2019 hnuaia rule te ngaihtuah mek a ni’ tiin a chhang a ni.

Hei bakah hian ‘office chuan CAA kaihhnawih thilah August 2020 khan Parliamentary Committee on Subordinate Legislation hnenah lehkhathawn a nei lo. I information dil hi khawi office ami nge a kimchangin i sawi lan a ngai’ tiin a chhang bawk.

The Hindu chuan July 20 khan MHA chuan rules tihkhawtlai chungchangah parliament hnenah engmah hrilh a la nei lo va, Parliament-in dan a siam hnuah rules te chu thlaruk chhunga peih fel hman tur a ni tiin a tarlang a. He report tihchhuah hnu hian MHA chuan Parliamentary Committee on Subordinate Legislation hnenah thla thum chhung pawhsei dilna thlenin remtihsak an nih hnuah November thlaa tawp tawh a ni a. MHA hian pawhsei a dil leh em tih hriatchian a ni ta lo thung.

Manual on Parliamentary Work ang chuan Ministries/Departments tena rules siam hun tuk thlaruk chhunga an siam fel hman lo a nih chuan ‘Committee in Subordinate Legislation hnenah pawhsei an duhna chhan sawiin dilna an thlen thei ang a. Hun pawh sei chu thla thum aiin a tam tur a ni lo’ tih a ni.

CAA kha Lok Sabha-ah December 9, 2019 khan passed niin Rajya Sabha-ah December 11, 2019 ah passed ni bawkin President of India chuan December 12-ah a pawmpui zui nghal bawk a. A hnuah MHA chuan notification tichhuakin January 10, 2020 ah hman tan tur a ti zui nghal a ni.

CAA hian Pakistan, Afghanistan leh Bangladesh atanga Muslim tih loh sakhaw dang paruk betute chu December 31, 2014-a India rama lut hman te chu khua leh tui nihna a pe thei a ni. Mahse,CAA chuan India rama dan lo anga lut leh dik lo taka khua leh tui nihna nei te chu a huam lovang, a ti bawk.

Prime Minister Narendra Modi chuan Bangladesh Prime Minister Sheikh Hasina nen December 17 ah virtual summit an nei dawn a, hei bakah hian Bangladesh Independence Day 50-na lawmnaah a tel dawn bawk a. Bangladesh PM chuan a hmain interview a neihnaah CA chu ‘tul lo’ tiin alo sawi tawh.

CAA rules te hi la peihfel ni lo mahse senior government official te chuan khua leh tui pek theihna chu online hmanga kalpui theih a nih thu sawiin mahse diltute chuan an sakhaw vawn finfiahna leh tihchianna an pholan a ngai thung ang, an ti a ni.

A hmain Assam sorkar chuan MHA hnenah CAA kalpui tur leh langtlang taka kalpui a nih theih nan thla thum chhung dilna hun hawng turin a ngen a. Oppostion member tam tak te chuan eng tiangin nge khua leh tui nihna dil tena sakhuana thila tihduhdah an nih an finfiah theih angin an sawisel bawk.

CAA hi Assam, Meghalaya, Mizoram leh Tripura tribal area-ah te Sixth Schedule to the Constitution hman a nih avangin hman theih a ni dawn lo va. Arunachal Pradesh, Mizoram leh Nagaland te chu Inner Line Permit (ILP) hmanga humhim an ni bawk. Hei vang hian heng ‘illegal’ immigrants te hi India khua leh tui nihna pek ni mahse heng hmunah te hi chuan an awm thei dawn chuang lo a ni.

Hetihlai hian Bharatiya Janata Party (BJP) leader Kailash Vijayvargiya chuan CAA chu West Bengal ah January-February 2021 ah hman tan a ni dawn tiin a sawi thung.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy