Kum liam ta 2025-ah khan Mizoramah ruah tui a tam a, tun hnai kum nga chhunga a tam ber kum a ni. State Meteorological Centre-a an chhinchhiah danin 2025-a ruah tui tla kha mm 2541.6 a ni.
2025-ah ruah tui a tam na a, kum tluana tam chu a ni lo. A tam laiin a tam em a, a tam ber thla May-ah khan mak tih tham khawpin a tam. May thlaa ruah tui tla zat ringawt pawh hian kum khat chhunga ruah tla zat a titam ta hluai a, May-ah khatiang zat kha sur lo ta se 2025-a ruah tui tla zat kha a tlahniam dawrh ang.
Nikum May-a ruah tui tla kha mm 718.3 a ni a, thla khat chhunga surah chuan tam tlerh tlerh tak a ni. 2024-ah khan May-ah remal cyclone ruah kenin Mizoram a tibuai a, May thlaa ruah tui tla kha mm 519 a ni. Kha kha a tam dan a namai lo a, hmun hrang hrangah chhiatna pawh a thleng a nih khan. Chu aia tam zawk fe chu nikum May-ah khan a sur a ni.
May-ah ruah nasa tak a sur hnuah, Mizorama ruah tui tam thla June, July leh August velah kum dang ang bawkin tluang takin a sur leh a, chu chuan 2025-a ruah tui tla zat a titam ta a ni, State Meteorological Centre lam chuan an ti. Mahse, kum dang nena khaikhinin, 2025 June, July leh August-tea ruah tui tla kha a tam tia sawi tur khawp chu a ni lo.
2025 kha tun hnai kum nga chhunga ruah tui tam ber kum a ni a, State Meteorological Centre-in an chhinchhiah china ruah tui tam ber kum 2017-a ruah tui zat (mm 2686.7) erawh a pha lo.
2025 kha ruah tui tam kum a nih rualin, khami kumah khan ruah a sur har a, a sur hnuah pawh a sur mumal lo. State Meteorological Centre-a an chhinchhiah danin, 2025-a ruah tui hmasa ber kha February ni 13-ah a tla chauh a, mm 32 a tla. A chawl leh vang vang a, March ni 13-ah a sur leh chauh. March ni 13-a sur hi mm 4 lek a ni a, a chawlh leh vang vang hnuah April-ah tam vak lo a sur leh chauh. Khami khan khua a ro rei a, 2024 December ni 22-ah teh tham ngawr ngawr mm 0.6 a sur hnuah 2025 February ni 13-ah a sur leh chauh.
Tun hnaiah pawh khua a ro a, 2025 December ni 29-ah khan teh tham ngawr ngawr mm 0.2 a tla. 2025 November ni 11-ah khan mm 0.2 bawk a tla a, chung chu tun hnaia ruah hnuhnung chu a ni mai.
Tun hnaia ruah sur zat
2021-ah MM 1917.6
2022-ah MM 2015.1
2023-ah MM 1972.8
2024-ah MM 2295.9
2025-ah MM 2541.6
Kum liam taah ruah tui tam
