Mizoram hi ruah tui tlak thatna hmun a ni a, kum
liam taah pawh khan kum dang ang bawkin ruah tui a tla tha. A hma kum a pha lo na a, 2023-a ruah tui tla zat kha a tam tham.
Khawchin leh sik leh sa chhinchhiahna State Meteorological Centre-in an chhinchhiah danin, 2023-ah khan Mizoramah ruah tui mm 1972.8 a tla a, a hma kum 2022-ah mm 2015.1 a tla. 2022-a tla zat a pha lo na a, 2023-a tla zat hi a tam an ti.
2023-ah hian January leh February-ah ruah a sur lo a, March thla atang chuan thla tin a sur.
Nikum khan ruah hi a sur har a, kum dangah January-ah a sur tawh thin laiin nikum kha chuan ruah hmasa ber hi March ni 16-ah a tla chauh. Ruah a sur har avang hian March thla chawhma lamah khua a lum hman a, lui tui te pawh a tlem hman. Mahse March ni 16-a a sur hian tam tham tak a sur a, mm 19.4 a tling. Kuminah ruah a la sur lo a, mahse sur lo rei a la ni lo.
2023 kha tun hnai kum nga chhunga ruah tui tam ber dawttu kum a ni; 2019-ah mm 1518.2 a tla a, 2020-ah mm 1741.5, 2021-ah mm 1917.6 a tla. 2022 kha a tam ber kum a ni a, 2023-in a dawt.
Directorate of science and technology enkawl State Meteorological Centre-in an chhinchhiah chinah 2017 kha ruah tui tam ber kum a ni a, khami kum khan mm 2686.7 a tla. 2019 kha a tlem ber kum a ni.
2017 kha ruah tui tam ber kum mai a ni lo, khaw vawh ber ni leh khaw lum ber ni pawh khami kuma mi kha a ni; State Meteorological Centre-in an chhinchhiah china khaw vawh ber tum chu 2017 January ni 13 kha a ni a, khami ni khan a vawh ber laiin 2.7 degree Celsius a ni a, a lum ber tum chu 2017 April ni 13 a ni a, khami ni khan a lum ber laiin 36.5 degree Celsius a ni.
Kum liam taah ruah tui tla tha
