Kum sawm chhunga Myanmar ramri hung zawh hman tum
Sorkar laipui chuan kilometre 1,643-a thui Myanmar ramri chu hung tumin hma a la tan a, Border Road Organization (BRO) chuan kum 10 chhunga zawh hman an tum.
Ramri hungna tur atan hian Rs. Vaibelchhe 20,000 vel hman tura ruahman a ni a, vaibelchhe 11,000 vel ramri kawng siamna tur hian hman tura ngaih a ni bawk.
Army chuan heng border fencing km 1,500 chuang hung turah hian Myanmar-India ramri him leh zual a nih theihna tur chuan km 300 zet chu electric fencing a ngaih tur thu an sawi.
Ramri hung tuma hmalakna hi Manipur-a Kuki-Zomi leh Meitei-te inkara buaina chhuak, mi 250 chuang thihna avanga nunphung pangngai a la awm loh laia hmalakna a ni.
Chutihrual chuan Myanmar-ah sorkar mumal a awm theih mai besei lohna avanga hmalak niin thulakna chuan a tarlang bawk.
Hetihlai hian Myanmar nena inrina nei – Nagaland, Arunachal Pradesh, Manipur leh Mizoram te chuan ramri hung hi an duh loh thu an sawi reng a, ramria awmte zalen taka an inkalpawh phalsakna dan, ‘Freedom Movement Regime’ (FMR) tihtawp phei chu an duh lo hle.
Kumin kumtir lam thleng khan ramria mite hi FMR hnuaiah hian lehlam ramah km 16-a thui thleng an inkalpawh thei a ni.
Kuki bakah Myanmar ramria cheng hnam hrang hrangte chuan he hmalakna hi hnam nunphung, kalphung leh hmanlai nun tihderthawnna tiin an lo sawi tawh thin a ni.
Mi thiamte chuan he hmalakna hi sum khawhralnaah an ngai a, ramria awmte inlaichinna tichhetu tur leh inhnaihna tihlatu mai tura an ngaih thu an sawi a, thil tha lo zawk thleng theiah an ngai.
Defence lam chuan he ramri hung hian civil mite inlaichinna leh inkalpawhna lam chu a tihbuai loh tur thu an sawi thung.
Biometric system hmangin inkalpawhna hi paltlang theih tura ruahman niin sawi a ni a, hemi tur hian ramri enkawltute leh tual chhung thuneitute phalna erawh a ngai tura ngaih a ni.
Ramri hung hi hel pawl khuahkhirh tumna bakah dan lova sumdawnna hrang hrang khuahkhirh tumna niin sorkar laipui chuan an sawi.
Kum sawm chhunga Myanmar ramri hung zawh hman tum
