Kum tharah ASF vangin vawk la thi lo

Kum tharah ASF vangin vawk la thi lo
African Swine Fever (ASF) hrileng a zia telh telh a, kum tharah he hri vanga vawk thi a awm rih lo.
AH&Vety department-in an chhinchhiah danin, December ni 23 atang khan January ni 6 thlengin Mizoramah ASF vanga vawk thi a awm lo.
Vawk thi report ni 15 chhung a awm ta lo a, hei hi thil lawmawm tak a nih rualin hri a reh ta tihnaah an ngai lo. AH&Vety department hotute chuan hrileng a zia an ti a, a reh tihna chu a ni lo an ti.
January velah he hrileng hi a zia ang tih rin sa a nih thu an sawi a, thlasik laiin ASF hrileng hi a zia thin ve reng reng tih te, nikum December atang khan hrileng hi a zia telh telh a, chu chu beisei lawk ang a nih thu te an sawi.
An chhinchhiahnaa vawk thi hnuhnung ber hi Saipum-a mi a ni a, vawk pakhat a thi. Aizawl district bikah chuan thla khat chuang vawk thi report a awm tawh lo.
Department hotute sawi danin, nikuma hri a leng tih finfiahna hmasahoah khan hri hi a reh tawh a, kum tawp lama hrilennaah kha chuan hri hi a la awm.
‘Hri hi a reh tawh tia sawi chu a har rih ang. A reh tak tak rih lo mai thei a, min chen chilh tawh avang hian hri hi chu a awm deuh reng turah ngaih a ni,’ AH&Vety department hotu pakhat chuan a ti.
Kuminah hian ASF vanga vawk thi a la awm loh bakah ASF vanga vawk tihhlum/suat pawh a la awm lo. Nikum pawh khan January-ah chuan ASF vanga vawk thi a awm lo a, nikuma finfiah hmasak ber chu February thlaa mi a ni.