Kum thum chhungin mipa thi zat zaa 60+
Mizoramah tunhnai kum thum chhunga mitthi awm atangin mipa thi zaa 60 chunglam vek a ni.
Lunglei Municipal Council (LMC) leh Directorate of Economics & Statistics tangdun chuan LMC huamchhungah chhiarpui (demographic census) an buatsaih dawn a. A chhiartu (enumerator) turte tan Nilaini khan Lungleiah training neihpui an ni.
Training petu Economics & Statistics deputy director H Lalnunzuala sawi danin, Mizoramah a tlangpuiin kumtin nau piang mipa zaa 51 aia tam lo leh hmeichhia zaa 49 aia tlem lo kan awm a. Kum 2022-ah mitthi zinga zaa 64.73, 2023-ah zaa 65.03 leh 2024-ah zaa 65.1 chu mipa an ni thung.
“Hmeichhia leh mipa inchawih tawk tura chunglamin a duansa chu ruihhlo vangin a khaw lo zo a, hmeichhia leh mipa zat inthlauhna dik tak hre turin inchhiar a pawimawh a ni,” a ti.
LMC chhiarpui atan hian Lunglei Govt College zirlai atangin enumerator tur mi 24, local council tin tan pakhat theuh ruat an ni a. Ruahman lawk dan chuan, August 18 leh September 15 inkar chhungin inchhiar a ni anga, September 1-20 chhungin data pawimawh chhutluh fel hman tum a ni. Thuang hrang hranga endik dan tur ruahman niin, peihfel a nih hnuah local council-te nen inrawn tlanga thlir ho leh a ni anga, tih tur tul leh siamrem ngai tihfel hnuah, kumin October 27-ah tlangzarh hman tum a ni.
Kum thum chhungin mipa thi zat zaa 60+
