Kum thum hnua chak lawm leh thei Marquez
Aragon tlankawng Spain rama kum 2021 intlansiak hnu lamah MotoGP race hnehna a chang leh ngai ta lo a, tun Pathianni liamtaah erawh vawiruk ngawt bike intlansiak level sangbera lo champion tawh Marc Marquez chuan hnehna lawm tur a nei ve leh ta a, a chipuite hmaah lehnghal 2024 Aragon MotoGP race-ah pakhatna a ni a, home fans lawm a hlawh ngang mai.
Spaniard Marquez hian ni 1,000 chuang zet liamtaah khan Emilia-Romagna-ah hian MotoGP race-a a chak hnuhnunber a lawm a, kha mi hnu khan Gresini Ducati chhuanvawr ni thin hi rider sagtliah ang maiin tlankawngah a inlan zui ta tlat a, kum thum chhung tehreng chak lawm tih ni a neih theih tak loh hnuah a chak hnuhnunberna hmun bawk Aragon-ah lawmman semna dawhsan chungnungber a luah leh.
Pathianni race-ah Turn 12-a a unaupa Alex Marquez leh champion tura rinkai zinga mi Francesco Bagnaia chesual dun tlanchhuak zo ta lo hlawkpuiin Marc Marquez hian nuamsain hnehna a chan theih phah a; a hnung chiaha pahnihna rawn luahtu runner-up Jorge Martin of Pramac Ducati nen second nga ngawtin an inthlau a; pathumna chu Red Bull GASGAS Tech3 rider Pedro Acosta a ni.
Lap tawp ber an tlan lai atanga chak lo lawm lawk tawh Marquez hian a home race-a hnehna a chan rualin championship standing-ah pathumna a luah chho nghal a, hmahruaitu Pramac Ducati rider leh a chipui ni bawk Jorge Martin nen point 70-in an la inthlau a; pahnihna luahtu leh double champion ni bawk Bagnaia lakah point 23-in a la hniam bawk.
Kum thum hnua chak lawm leh thei Marquez
