Kum tling lo inneih tihbo
tuma hmalakna khuhhawn
India ram puma naupang kum tling lo inneih tibo tura beihpui thlak tur, “Bal Vivah Mukt Bharat” (Child Marriage Free India) chu Nilaini khan New Delhi-ah khuhhawn a ni a. Union minister for Women and Child Development Annpurna Devi chuan a hawng.
Mizoram atangin Child Marriage Prohibition officer (CMPO) pali – Aizawl, Lunglei, Champhai leh Mamit an tel a, tawnhriat inhrilh tawnna hunah Lunglei CMPO C Lalnunfela’n Lunglei district-a kum tling loa nupui pasal inneih tibo tura hma an lakna a sawi a. Inzirtirna an buatsaih rah chhuahah Lunglei district-a khaw pakhata innei tur, a mipa zawk kum 21 la tling lo chu an inneih hun tura ruahman January 2024-ah innei loin, a kum tlin hun May 2024-ah sawn phah a ni nghe nghe.
Union minister chuan kum tling loa nupui pasal nei awm lohna India siam tura beihpui thlak tur a hawn rualin, kum tling lo inneih venna leh a that loh zia inzirtirna atan, kum tling loa nupui pasal nei an awma report siamna atantea hman tur online platform – ‘Child Marriage Free Bharat’ portal a tlangzarh nghal a ni.
Minister of state for Women & Child Development Savitri Thakur bakah sawrkar laipui leh state hrang hrang atangin mi pawimawh an tel a. Kalkhawmte hian kum tling loa nupui pasal inneih tibo tura hma lak zel an intiam a ni.
Campaign hawnnaah hian state hrang hrang CMPO-te mawhphurhna leh tih tur inhrilhfiah a ni.
Kum tling lo inneih tihbo tuma hmalakna khuhhawn
