Kumin chhungin Haiti-ah mi sual chetna vangin mi 5,700 thi leh hliam awm tawh

UN chuan January 1 leh September 11 inkar khan Haiti-a mi sual pawl chetna leh beihpui thlaknaah mi 5,700 chuang thi leh hliam an awm tawh niin a sawi.
UN High Commissioner for Human Rights Volker Türk-a chuan hetih chhung vek hian mi 230 chuang ruk bo an ni bawk tih a sawi.
Hmeichhia leh hmeichhe naupang 1,000 vel pawngsual anga chhinchhiah a ni a, Türk-a erawh chuan a tak takah chuan ‘hei aia tam daih’ a nih a rinawm tih a sawi bawk.
Haiti-ah hian mi sual pawlte hian kum tam tak kal tawh atang khan ram zau tak an thunun a. Tun hnaia buai lehzualna hi July 7, 2021-a President Jovenel Moïse-a thah a nih atanga intan kha a ni.
Zirtawpnia Caribbean rama thil thleng chhinchhiah dan puannaah Türk-a chuan thi leh hliam zingah a zahve chuang chu venhim hna thawktuten mi sual pawlte an beihnaah a nih thu a awi a, mi tam tak ‘silaimu leh drone puak vek karah’ an tangin an thi thin niin a sawi.
Moïse-a hun lai pawh khan mi sual pawlte tharum thawhna hi a tam sa reng a; mahse, thah a niha thuneitu mumal a awm loh lai khan mi sualte hian ram tam zawk lak belhin huhang an nei na zual ta a ni.
Türk-a chuan mi sualte hi ‘insiam remin huang an zauh zel’ tih sawiin UN-in finfiahna a lak khawmah pawh ‘ram an lak belh nana kal dan mumal an nei a, inkalpawhna an thunun a, ram nghehna an tiderthawng hle’ tih a sawi.
Police unit bikten mi an tihhlum zat erawh tun hnaiah a tlahniam tih a sawi a; mahse, mipuite chuan mi sualte nena inzawmte chu tihhlum mai theih dinhmunah an dingah an ngai thung.
High commissioner chuan mi sual pawla tel tura naupang lak chu ‘a let thum dawnin’ a pung a, kumtlinglo tam tak tan chuan mi sual pawla tel hi ‘an dam khaw chhuahna awm chhun’ a ni ve bawk tih a sawi.
“Naupangte hi an nunna leh an chhehvel himna inkara an khawsa a ni ber,” a ti.
Haiti hian kum 2016 hnua a vawi khat nan president leh legislative inthlan chu December 13-ah neih turin an inbuatsaih mek.
Haiti-ah hian kum 2025 atang khan ram tangrual atangin police an lut a, anni hi mi sual pawl chetna hmet mit tura tih an ni a; mahse, ram an lak belhna erawh tun dinhmunah chuan an la dang thei lo.