Kumin inthlan bak chu ZPM hi party anga an kal peih a rin tawh loh thu leh an kal zel a nih pawhin hming dang an thlak leh mai a ring tih MNF vice president Lalthlengliana chuan a sawi.
Ningania E Lungdara Hrangturzo bial MNF campaign khuhhawn a hmanpuinaah Lalthlengliana chuan MNF chu a chhe berah bial 30 vela an tlin a beisei tih a sawi. ZPM chu party ruhrel nei lo, tlan tau kalkhawm, hruaitute pawh inngeih lo nia sawiin, “Zemabawk LC by-election leh Lunglei Municipal inthlanah an che tha ve deuh a, an thaw lian hma lutuk a. Tunah chuan an mi tha tha kha kan lawmlut leh tawh. Kumin inthlan bak hi an party an kal peih tawh loang, an kal zel a nih pawhin hming dangin an thlak leh mai ang,” a ti.
Congress party chu central-ah an tlachhe tawh em em a, North East ah an chhe vek bawk tih sawiin, helaia Congress pawh tho leh tur chuan kum 15 vel hun an la mamawh tur thu a sawi. MNF chuan hruaitu tha leh rintlak Pu Zoramthanga an nei chu an vannei hle, tiin, a kaihhruaina hnuaiah kumin inthlan an sawrkar leh ngei dawn tih a sawi a ni.
MNF chu kalphung nghet nei sa, kum 60 chuang meimit loa kal tawh an ni tih MNF vice president hian sawiin, Mizo nationalism ah thangtharte an harh thar zel a tul tih a sawi. Mizo hnam rilru dik tak puin, thangthar tam tak chu Mizo nationalism-ah an harh thar a, a lawmawm hle tih a sawi bawk.
“Sawrkar tharah chuan khuanun zah a ngai anga, sawrkar hmasa hun lai anga harsatna hrang hrang kan tawhte pawh a kiam ve tawh ang a, ram leh mipui tan theihtawpin hna kan thawk zel ang,” a ti.
Kumin inthlan bak ZPM an kal peih tawh lo ang – MNF vice president
