Daily Newspaper

Kumina footballer sum huilut hnem ber Messi

24

Hripui kara sum lakluhna a chawlh thup karah pawh Lionel Messi han tih angte chu an sumtlang a hek mawh fat fat khawp mai a, Forbes magazine-in kumin chhunga footballer-te sum huiluh dan zirchianna a tar-chhuahah US dollar maktaduai 126 (£97.2m) a hlawhchhuak tling dawn tih an puang a, an money list tharah a ler luahtu a ni leh.

Barcelona atanga chhuah dil hlawhchham Argentine forward hnuai chiahah hian Juventus superstar Cristiano Ronaldo awmin, kum 2020 chhunga a sum lakluh hi US dollar maktaduai 117m (£90.3m) niin an chh<tsak ve thung.

Forbes money list-a pathumna chu Neymar Jr. niin, a hnuai chiahah a Paris St-Germain team-mate Kylian Mbappe a awm. He list tharah hian Real Madrid leh Wales forward Gareth Bale rualin Premier League player pathum – Mohamed Salah, Paul Pogba leh David de Gea-te chuan top 10 an luah ve ve bawk.

Welshman Bale hian hlimawm loh zetin 2019-20 season hmang-liamin, club lamah Real boss Zinedine Zidane-a duhsak a hlawh zo lo a, an game hnuhnung vawi 14-ah vawikhat chiah khel pha mah se pound maktaduai 29 (£22.4m) a huiluh hmangin sum lalut tam pariatna a ni pha.

Liverpool forward Salah chu panganaah awmin, a hnuai chiahah Manchester United midfielder Pogba kan hmu a; pasarihna chu Barcelona forward Antoine Griezmann niin, pakuana luahtu chu Bayern Munich striker Robert Lewandowski a ni a, top 10 tikimtu chu United goalkeeper De Gea a ni thung.

Tuntum list-a top three-te hi nikuma an indawt dan chiah kha a ni leh a; hmasawn chak Mbappe erawh kum 2019-a pasarihna atangin kumin hian palinaah a lawn chho.

Kumina a dinhmun ngai huma a sangber luah chhunzawmtu kum 33 mi Argentine Messi hian tun nipui thawt lai ngeia Barcelona chhuah-san tumin August thla khan chhuah dilna a thehlut a, mahse, eng club mahin leichhuak tura sum sen ngai zat an phawrh ngam loh avangin a sukna ngaiah a contract neih laia a season hnuhnungber chu a su leh phawt dawn a ni.

Forbes tarlan danin, Barca star Lionel Messi hi football beh-chhana billionaire ni thei pahnihna niin, he dinhmun hi a hma deuh khan a elpui lianber Cristiano Ronaldo chuan a lo luah tawh a; a career-ah Argentina captain hian chhiah pek hmain US dollar billion khat a hlawh kai ve ta niin Forbes chuan a tarlang.

Kumin bika Messi sum hailuh tur US dollar maktaduai 126 hi a hlawh US dollar maktaduai 92 leh sumdawnna lam atanga a huiluh tur tlingkhawm US dollar makta-duai 34 belhkhawm a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy