November thla tawpah Spotify Wrapped season a lo her chhuak a, kum tluana zaithiam leh hla he streaming platform a stream nasat te tarchhuahna hun a ni a, 2023-a stream nasat ber chu tudang ni lovin Taylor Swift a ni e.
Drake, Bad Bunny leh Ed Sheeran te hi Spotify-a stream nasat ber pawl a ni a, Ed Sheeran hi 2014 leh 2017-ah Spotify-a stream nasat ber lo ni tawhin, Drake hi 2015, 2016 leh 2018-ah stream nasat ber niin, Post Malone pawh 2019-ah rawn lang nawlhin, hemi kuma stream nasat ber a ni a, Bad Bunny chu 2020, 2021 leh 2022-ah stream nasat ber niin, Bunny leh Drake te hi he streaming platform-a stream nasat ber kum thum ni thei awm chhun an la ni.
Kumin chu Taylor Swift kum a ni a, chart leh tour bakah Hollywood lam thlengin a concert movie-in record a siam zel a, streaming-ah pawh tuma tluk phak rual lohin a sang fal nal nal hle a, stream tluklehdingawn 26.1 tlingin, 2023-a Spotify-a stream nasat ber a ni a, Swift hian record siamin he streaming platform-a kum khat chhunga vawi tluklehdingawn 20 stream kai thei hmasa ber a ni bawk.
Kumina Spotify-a zaithiam stream nasa ber Taylor Swift
