lhhlawh paihnan Aizawl Municipal Corporation chuan kumin chhung bikah cheng vaibelchhe 4.9 chuang a seng tawh a, bawlhhlawh nitin metric ton 100 chuang paih tur a awm a ni.
Aizawl Municipal Corporation (AMC) hian khawpui chhunga bawlhhlawh paih lirthei khalhtute a kokhawm a, bawlhhlawh paih kawnga hriat tur pawimawh inhrilh niin, Transport department leh Traffic Police officer-ten an hriat tur an hrilh bawk.
AMC executive corporator Laltlanzova Khiangte sawi danin, Aizawl khawpuiah nitin bawlhhlawh tawihthei lo (dry waste) metric ton 75.26 leh bawlhhlawh tawihthei (wet saste) MT 32.92 paih thin a ni a. Local Council 85 atangin garbage truck (bawlhhlawh phur lirthei) 151 hman mek a ni a, kumin chhungin Rs. 4,91,19,342 an sengral tawh a, thla khatah cheng nuai 45-58 vel AMC-in a hmang.
Municipal commissioner Er. Lalhriatpuia chuan bawlhhlawh lakhawmtu truck-a bawlhhlawh hi khuh ngei tur a ni tih a sawi a. A khuh lo te chu SWM Bye Laws 2019 hmangin Rs. 5000 chawitir theih a ni a, a hmun loa bawlhhlawh paih leh Solid Waste Management Center (SWMC) thlen loa bawlhhlawh phur truck atanga bawlhhlawh thehthang /hralh chu SWM Bye Laws 2019 hmangin Rs. 5000 chawitir theih a ni tih a sawi. Aizawl khawpui vawnfai kawngah driver-te nen thawh ho tlan a pawimawh tih a sawi bawk.
Transport department leh Traffic Police atangin driver-te tana hriat tur pawimawh inhrilhfiah a ni a, zawhna chhan a ni bawk. Hawihhawm taka an lirthei khalh thin turin an chah a, midang tana harsatna siam lo zawnga bawlhhlawh khawnkhawm turin an ngen.
Kuminah bawlhhlawh paihnan AMC-in cheng vbch.4 seng tawh
