Kuminah hian Mizoramah mahni intihlum 60 an awm tawh a, hetianga harsatna neite hian an harsatna hriatthiampuitu an mamawh hle tih chu mithiamte sawi dan a ni.September 11 kha mahni intihhlum hluar zel laka invenna leh inzirtirna Ni – World Suicide Prevention Day a ni a. Mizoramah pawh National Mental Health Programme bultumin Aizawlah hman a ni.
Heta report a nih danin, Mizoramah kum 2011 atanga kumin July thleng khan mahni intihlum mi 1145 awmin, chu’ng zinga 954 chu mipa an ni a, 191 chu hmeichhia an ni. Mahni intihlum hi kum 20-39 inkarah an tam ber. Kuminah hian mahni intihhlum 60 an awm tawh bawk.
Mahni intihhlum tum, beidawngte dawngsawng a, an harsatna leh buaina ngaihthlak sak turin helpline – TeleMANAS a awm a. TeleMANAS helpline no. 14416 leh 18008914416 hmangin counsellor leh thawktu dangte englai pawha biakpawh theih an ni tih sawi a ni.
Health & Family Welfare principal director Dr Vanlalsawma chuan mahni intihhlum duhna chu rilru lam harsatna a nih avangin kum bithliah a awm loa, mitin chunga thleng thei a ni, tiin, “A awm chhan hi a tlangpuiin kan thil lo tih tawh leh tih lai mekin min vuaklet avangte, chumi sawhkhawkin a thlen harsatna palchhuak zo dawn loa inngaihna vang a ni duh hle. Chuvangin, hetianga harsatna neite hian an harsatna hriatthiampuitu an mamawh a. An lakah dawhtheihna kan neih a ngai,” a ti.
Kuminah intihlum 60 “Intihhlum duhna neiten hriatthiampuitu mamawh”
