Kuminah April thleng khan Mizoramah malaria vanga thi chhinchhiah an la awm lo.
Mizorama sikserh (malaria) dinhmun, a invenna leh malaria case tih tlemna’n state sawrkar hotute sawipui tura Mizoram lo zin mek Central Team chu Ningani khan Health & Family Welfare minister Dr R Lalthangliana leh department hotute nen an thukhawm. Central Team hi Ministry of Health & Family Welfare joint secretary Rajiv Manjhi chuan a ho a, mi 6 an ni.
Heta report danin, kum 2022 khan Mizoramah malaria case 10229 hmuhchhuah niin, ram pumah malaria case tamna chhutin Mizoram chu 7-na a ni. Hmarchhakah Mizoram chu malaria hmuhchhuah tamna ber state a ni a. Kum 2022 khan malaria vangin mi 10 an thi. Kumin January atanga April thleng khan malaria case 1734 hmuh tawh niin, malaria vanga thi an la awm lo. Lawngtlai, Lunglei, Mamit leh Siaha district chu malaria tam zualna district an ni. Kum 2022- 2023 khan phar natna mi 7 hmuh chhuah niin a kum hmasaa hmuhchhuah chu pakhat a ni.
Health minister chuan an thlirhona chu department-in sikserh do kawngah an hlawkpuiin hmathar an laknaah rah tha a chhuah ngei a beisei tih sawiin, sikserh dona leh tihtlem kawngah department chuan tun aiin tan a khawh leh dawn tih a sawi. Mizorama malaria case tamna district – Lawngtlai, Lunglei, Mamit leh Siaha te chu tlawhchhuah a tum thu leh heng district-a malaria lama thawktute bakah District Council-te pawh hemi chungchang a sawipui tum thu a sawi a ni.
Ministry of H&FW joint secretary chuan National Centre for Vector Borne Disease Control (NCVBDC) Team-in Lunglei leh Mamit district an tlawh tuma an thil hmuh dan leh rawtna an siam sawiin, kum 2015 atanga 2018 chhungin Mizoramah malaria case a tlahniam a, mahse kum 2019 atangin a pung chho leh a, hei hi thil ngaihtuh ngai tak a ni, tiin, “A dona kawng hrang hrang ennawn a, enge tha ber ang tih ngaihtuah a ngai. Mizoramin sikserh dona kawngah a mamawhte kan ngaihtuah zel dawn a ni,” a ti.
Kuminah malaria vanga thi la awm lo
