Kuminah ni tin Maoist pahnih la that ziah

Kuminah ni tin Maoist pahnih la that ziah
Kum 2025 January chawlhkar thum liam ta chhungin Maoist 48 thah an ni tawh a, ni tin pahnih zel thah ang an ni tih Ministry of Home Affairs (MHA)-in a chhinchhiahnaah tar lan a ni.
Thawhtanni khan Chhattisgarh-a a huhova beihpui thlaknaah Maoist 14 thah an ni a, an zingah hian core committee member, a luman pawh Rs. vaibelchhe 1 chhiar lai, Jairam-a a tel.
“State leh sorkar laipui thawhhoin rah duhawm tak a chhuah a ni,” tiin ministry-a hotu sang pakhat chuan a sawi a. MHA chu March, 2026-a Maoist-te nuai chimit vek turin hma thar lak zel dan turah state sorkarte nen an inrawn reng tih a sawi.
Sipaite chu ramhnuai pilril zawkah lutin tun hma lama mihring awm lohna tia sawi thin hmun thlengin base camp an siam tih a sawi.
“Kum 2019 atang khan camp 290 siam tawh niin nikum chhung ringawtin 58 siam a ni a, kuminah hian 88 siam tum a ni a, a hmunhma tur leh tul ang tihfel mek zel a ni,” a ti.
MHA-in a chhinchhiah dan chuan kum 2024 khan naxal hel 290 thah an ni.
Tun hnai lawk khan sorkar laipui chuan scheme pawimawh tak pahnih – Special Infrastructure Scheme (SIS) leh Special Central Assistance (SCA) te chu March, 2026 thleng atan a pawt sei bawk.
SIS scheme atan hian pawh sei zawng zawng nen Rs vaibelchhe 1,160 ruahman a ni a. MHA chuan state police-te chu venhimna tihchak nan te, chhui hna thawh nan te, hma lak tawhna en zui nan te tha taka hmang turin a ti.
SIS scheme pawh Rs. vaibelchhe 1,160 senna tura ruahman a ni a. He scheme hi kum 2017-a pawm kha niin Subsidiary Intelligence Bureau (SIB) leh Maoist tamna state-a anmahni beitu bikte tihchakna tur bakah Rs. vaibelchhe 2.5 theuh senga police station 250 dinna tur a ni.
Sorkar laipui chuan Special Central Assistance (SCA) pawh left wing extremist tamna district-te tan March, 2026 thleng a pawt sei bawk a. He subscheme hi kum 2017-a pawm, Modernisation of Police Forces scheme hnuaia mi a ni.
He scheme hmang hian Maoist tamna district tan vantlang hmunhma leh thil tihchangtlun a ni a, state pariata district 25 tan Rs vaibelchhe 3,450 pek chhuah tawh a ni.