Kuminah nikuma thi zat ruihhlo vangin thi tawh

Ruihhlovin thalai a tibuai a, kuminah nunna hlu tak
a la nual tawh. Kumin hian Mizoramah nikum kum tluana ruihhlo vanga boral zat an boral tawh.
Mizoram Excise & Narcotics (MEN) department chhinchhiahnaa a lan danin kuminah July ni 17 thleng khan mi 43-in ruihhlo vangin nunna an chan tawh a, nikum kum tluana nunna chan zat kha 43 bawk a ni.
Kumina ruihhlo vanga nunna chante hi mipa 36 leh hmeichhia pasarih an ni a, heroin vang deuh vek tiin a sawi theih; heroin leh ruihhlo chi dang tih pawlh vek an ni.
Nikum khan mipa 39 leh hmeichhia pasarihin ruihhlo vangin nunna an chan a, kuminah hmeichhia an pung.
Tunlaia ruihhlo lar heroin hi tun hma chuan a neinung deuhte tih tura ngaih a ni a, mahse tun hnai kum 10 chuang kal ta atang khan ruihhlo hluar ber a ni tawh. A hma chuan Mizorama ruihhlo hluar ber, nunna latu ber kha proxyvon (spasmo proxyvon leh parvon spas) a ni thin a, he damdawi hi a chhuak tawh lo. Chumi hnu-ah chuan heroin a hluar ta a ni.
MEN department hotute chuan Myanmar buai hnuah heroin hi Mizoramah man tur a pung nasa tih an sawi a, Manipur buai hnuah a hlawm tam thama man tur a pung tih an sawi bawk.
An chhinchhiahna enin, 1984 hnuah Mizoramah mi 1779-in ruihhlo an vanduaipui tawh a, mipa 1567 leh hmeichhia 212 an ni. A tam ber chu parvon spas/spasmo proxyvon vanga nunna chan an ni a, mi 1161 an ni.