Kuminah RTI zawhna 1107 lut tawh

Kuminah RTI zawhna 1107 lut tawh
Kuminah RTI dan hmanga zawhna lut 1107 a awm tawh tih state chief information commissioner John Neihalai chuan a sawi a. RTI online kalpui hnu ah zawhna hi a lut tam tih a sawi.
Mizoram State Information Commission hotute chuan Thawhtanni khan Lawngtlai district-a state public information officer (SPIO) leh state assistant public information officer (SAPIO) te chu RTI Act chungchanga an hriatchian ngai an zirpui a. Chief information commissioner chuan, Mizoramah RTI online-a kalpui a nih atangin, zawhna a lut tam a, kumin bikah zawhna 1107 a lut tawh tih a sawi. Zawhna a tam zel avangin SPIO leh SAPIO ten theithawp chhuah a tul, tiin, data an neih danah tun dinhmunah SPIO leh SAPIO-te an thawk tha hle tih a lang tih a sawi a ni.
Mi thahnemngaite thawhrimna azarah RTI Act chu 2005 October 12 atang khan India rama hman tan niin, Mizoramah chuan RTI Act kalpui turin June 2006 khan Mizoram Information Commission din a ni tih a sawi a. Dan tha tak siam tura theihtawp chhuahtute an fakawm tih sawiin, RTI Act chu ngaihlua ngaipawimawh turin a chah.
Hlawhtling taka RTI Act kalpui turin SPIO leh SAPIO ten mawhphurhna sang tak an nei tih CIC hian a sawi a. Mipuiin zawhna an neih a hun taka chhan a nih theihnan inring reng turkin a chah. Hrem ngai lo zawnga hna thawk turin a ngen bawk.
MSIC secretary H Dolianbuaia’n RTI Act 2005 chungchang SPIO leh SAPIO te hriat tur pawimawh a zirtir a, zawhna awmte chhan a ni.