Tualchhung zu a pung nia sawi a ni a, tun hnaiah Aizawl vela tualchhung zu siamna hmunte an thang nia sawi a ni. A mantu lam pawhin an man malh malh a, kuminah an man hnem tawh hle.
Mizoram Excise & Narcotics (MEN) department-in kuminah April ni 30 thleng khan tualchhung zu hi litre 22,719.615 an man tawh a, kum hmasa lam nena khaikhinin, kumina thla li chhunga an man hi a tam khawp mai.
MEN department chhinchhiahna enin, 2020-ah khan tualchhung zu hi litre 46,083.762 an man a, 2021-ah litre 40,334.032, 2022-ah litre 75,701.595, 2023-ah litre 81,221.885 an man.
2021 atangin kum tinin an man zat a pung a, 2022-ah phei chuan nasa takin a pung. 2023-ah pawh a pung leh a, kuminah thla li chhungin an man hnem leh tawh viau bawk.
MEN department hian kuminah April ni 30 thleng khan zu bilh lai tin 41,121 an man tawh a, zu siamna bungbel 642, dawidim kg 12,500 an man tawh bawk.
Tun hnai kum hnih kum thum chhungin Aizawl velah zu siamna hmun a thang nasa nia sawi a ni a, MEN department hotute thlir dan pawh a ni.
MEN department hotute chuan hmun hla tak taka zu an mante pawh Aizawl vel atanga an lak a lo ni leh thin tih an sawi a, Aizawl vela mi hian Mizoram hmun hla tak tak an chawm nia a lan thu an sawi.
Kuminah tualchhung zu man hnem tawh
