Daily Newspaper

Kumthar Thuchah:

168

KRISTAA NUN THAR – TISUAL ZEL TAWH LO NUN

1 Johana 3:9

Dr PC Biaksiama

Krista chhandamna changa piangthar tawh, Pathian fa nihna changa, thlarauva hrinte chuan Pathian zia an pu a, suala awm reng nen a inrem tawh lo. Hmangaih Johana chuan, “Mi tupawh amaha awm reng chuan thil sual a ti lo,” a ti hial mai (1 Joh. 3:6). Miin thil a tihsual leh thinna chhan pawh tihian a sawi zui a: “Mi tupawhin thil sual a tih chhung chuan amah (Pathian) chu a hmu lo va, hriat pawh a hre hek lo,” a ti a ni (1 Joh. 3:6).

Thlarauva hrin mi piangtharten thil an tisual reng thei lo tih pawh tihian a sawi hial mai: “Mi tupawh Pathian hrin chuan thil sual a ti reng lo, Pathian chi amahah a awm tawh avangin; Pathian hrin a ni miau va, thil sual ti zêl thei a ni tawh lo,” tiin (1 Joh. 3:9, MKJ Bible).

Heta ‘thil sual a ti lo’ ti hiala Johana ziak hi ngaihsual palh theih a ni a. Vawi khat pawh tisual zeuh thei tawh reng reng lo ang êma ngaih tur a ni lo. Ringtute hian kan pianthar hnu pawhin kan lo tisual leh thin a. Mahse kan inchhîr a, thupha te kan chawi a, kan sim leh thin a nih hi. Mahse tun hmaa sual tih reng mai ang kha a theih ta lo va, ringtute awmdan pawh a ni tawh lo. Mi thar, thil siam thar an nih tawh avangin, nundan thar an nei tawh zawk a ni. Sual tih châkna pawh a bo ta thak a ni lo; mahse anmahni awmpuitu Thlarau avangin sual ti lo tura khaptu – anmahniah a lo awm tawh avangin pawisa lo takin sual an ti thei tawh lo a ni.

Lehlamah erawh chuan Pathian hrin ni ve tak tak si lote erawh chuan Krista thianghlimna nun tawmpui si lovin, pianthar tawh chuan sual kan ti thei tawh chuang lo ve, ti ni awm takin, tisa thil tam tak an ngaizam a; sual tihna remchangah an hmang a, tlûk phah nan an hmang thin. Chutiang mite zia chu thlarauva bultan ve si a, tisâa zo an ni a. Anmahni pâwlzui zeltu thlarau mize dik lohzia a lang chiang tawlh tawlh a; tichuan, chung mite chu Paulan ramhuai thlarau tia a sawi, hruaibona thlarau (deceiving spirits) a tihte kha an ni tih an rahah a lo lang chhuak thin a ni (1 Tim. 4:1). Chuvangin, mi tupawh Pathian hrin chuan thil sual a ti reng lo, Pathian chi amahah a awm tawh avangin; Pathian hrin a ni miau va, thil sual ti zêl thei a ni tawh lo,’ tih hian Pathian mi dik leh dik lo chu a thliar hrang mai a ni.

Tichuan, 1 Johana 3:9 hi Richard Alderman-a chuan tihian a hrilhfiah a: “Tupawh Pathian hrin chuan a tha lo tih hre reng chungin thil a tisual lui reng thei tawh lo; Pathian hrin a nih avang leh Pathian chi chu amahah a awm ngheh tlat avangin tisual reng thei a ni tawh lo (he cannot practice sinning). Chutah tak chuan Pathian fate leh diabola fate chu a hriat hran theih tawh mai a ni (chang 10), a tihna a ni. Heng changten an tarlan chu, piangthar tan tihsual zeuh pawh a theih tawh loh, tihna ni lovin, hre reng chung chuan sual a tizui zel thei tawh lo; amaha Pathian chi awma khan sual a ngai thei tawh lo; amahah ngaihthat lohna, dik lo tih hriatna, rilrua inthiamlohna leh tuarna engemaw a thlen theih thin vangin,” (Dr. Richard C. Alderman, Once Saved Always Saved, p. 41)

He lehkhabu ka buatsaih lai hian counselling turin mi pakhatin min rawn pan a. Amah chu mi piangthar, rawngbawltu speaker ni ve hial, mahse sualna kawng hrang hrang lo dai a, vanduaina lo tawk tawh a ni. A nun a tuihâl a, sualah tlu mah se chutah chuan a hlim thei tawh si lo; a nun buarchuar tak atanga insiamthat leh a, Lalpa nena lêndun (fellowship) neih leh a duh a ni. Tichuan, counselling te, tawngtaisakna te ka neih hnuah chuan, a thil tawh atanga a inhmuh chhuah chu: “Piangthar chu sualah a hlim thei tawh lo” tih thu hi a ni a, chu thudik chu ama nun ngei chuan a takin a au chhuahpui a ni. Mi tupawh piangthar inti mah se, a thil sual tih avanga lungngaih nachang hre chuang lo, khawvel thlahlel zawk a, la hlim thei tho a nih chuan thlarauvah a la piang lova, tisa thil ngaithei lo Pathian ‘chi’ chu amahah tuhin a la awm lo, tihna a ni.

Piangthar emaw lo inti ve ngawt, mahni nuna Krista nei si lo, thlarau dinhmun chiang lo, hremhmuna kal tur chuan inphal bawk si lo, vanram kalna tura a neitu Krista nun la nei bawk si lo te kan awm a nih chuan, he kumtharah hian nunna thar, chatuana nunna Isua Krista chu i ta ngei a ni tih lo inman chiang turin Lalpa Thlarau chuan malsawm che rawh se. He kumthar 2022-ah hian rinnaah ka awm nge awm lo tih mahni inenfiah turin thahnem i ngai ang u. Lemchang kristian, a tak aia ang mah mah, rawngbawlna lamah pawh tluang zurh ang si hian a awm ve reng theih a ni; chutiang mi chu kan inphûm fur mai thei zawk a ni, rawngbawltu zingah pawh hian.
Engkim enfiahtu Pathian rorelna hmaa kan din hma ngei hian sim tur nei apiangin sima, Lalpa khawngaihnaa tlûk luh nan he kumthar hi i tan – thlarau leh taksa lama malsawmna kum tha lo ni rawh se. Lalpa khawngaihna chu i chungah lo thleng rawh se. Amen.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy