Kurtai hmel thar ruahman tum
Sawrkar puihna in Lunglenga fu chingtu kurtai siamtuten kurtai hmel thar leh chi hrang tam zawk an siam theih dan ruahman pui an ni a. He ruahmanna hi Ningani khan Agriculture & Farmers’ Welfare minister PC Vanlalruata chuan a hawng.
Planning & Programme Implementation department hnuaia Mizoram Science, Technology & Innovation Council (MISTIC) chuan “Fostering Sustainable Development Goal No.9” hnuaia industry, innovation leh infrastructure tihchak zelna tur kawnga project peng pakhat – “Development of Jaggery Industry at Lungleng-I Village” tih hmangin Lungleng-I Multipurpose Primary Agriculture Credit Cooperative Society Ltd. (MPACS) nen an thawk dun a. He project hnuaiah hian Lungleng-I khuaa fu chingtu chhungkua chu kurtai tam zawk leh tha zawk an siamchhuah theihnan kawng hrang hrangin puih an ni.
Inpuihnaah hian kurtai sawngbawlna leh hralhchhuahna atan multipurpose building leh a chhunga office bungrua bakah computer, fu chinna ram zau zawk kalpawh theihna tur kawng, fu chingtu chhungkuate tan thlam leh kurtai chhuanna thuk, kurtai siamchhuahna hmanrua, tui mamawh lak leh dahkhawlna tur hmanrua, kurtai funna leh a pack-na khawl a tel a ni.
He hmalaknaah hian kurtai pangngai bakah a cube chi, tuina (flavour) hrang hrang nei siamchhuah tan mek a ni a. Hengte hian chaw tha (nutritional value) an pai dan pawh Food Testing Laboratory-ah enchhin tir vek a ni tawh. Branding leh marketing lam thlengin a tul ang ang buaipui sak mek an ni a. A chhawrtu chhungkua hian MISTIC nen training tum engemawzat an nei tawh a, Society hruaitute hi Lucknow-a ICAR-Indian Sugarcane Research Institute-ah training tura hruai an nih tawh bakah Lucknow lam mithiamte hian fu chinna hmunah training an rawn neihpui tawh bawk.
Cooperation minister ni bawk PC Vanlalruata chuan amah pawh naupan lai atanga fuhuan neia kurtai lo buaipui tawh thin a ni tih a sawi a. Lungleng-in khawtlang huap pawha buaipui tham fu chin leh kurtai siam lama hma an la chu tanpui an awm hliah hliah, tiin, “Kurtai siam lamah hma sawn a hun tawh a, hmun danga farmer tan pawh entawn tlak, model nih tlin tum ang che u,” a ti.
Zoram puma kuthnathawktute mamawh chu link road a ni tih a sawi a. ‘Zau policy’ chu sawrkar pawhin a buaipui chho zel dawn tih a sawi a ni.
Kurtai hmel thar ruahman tum
