Pawl Kut hman tawp ni khan chief minister chuan thangtharteah Mizo pi pute chanchin leh nun dan zirtir zel a tul thu a sawi a. Hmanlaia Mizote chanchin leh an nun dana zir tur tam tak a awm a, hengte hi thangtharte kan zirtir leh hrilh a pawimawh a, chutiang atan chuan Pawl Kut hi hman tangkai a tha, tiin a sawi a.
Pi leh pute khan kum khat chhungin Kut pahnih, Pawl Kut leh Chapchar Kut bak chu khawtlang huapa intihhlimna hun an nei vak lo a, chuvangin Kut a lo thlen hi chuan an urlawk nasain âm takin an hmang thin. Tun hnuah hi chuan tunhmaa Kut a lo thlena an chelek em em Zu chi hrang hrangte kha chelek theih a lo nih tak loh avangin chi dang deuhva Kut hman dante pawh her danglam a lo tul ta hial a. Tunhma ang diak diaka Kut te hi hman theih a nih tawh loh avangin, ‘hmanlai pi leh pute tih dan phung hlimthla vawn nunna’ ang deuh chauh a nihna lai a awm tawh a. Chutih laiin kan hun tawng mil zela intihhlimna hun tha takah erawh kan hmang zui zel thei awm e.
Hetih rual hian, tunhmaa pi leh pu ten Kût an lo hman thin dan hlimthla erawh thangthar zelten an vawn nun reng theih nan Kut kan hmannaah hian a tak ang thei tur ang bera entir zel ni thei se a duhawm hle a. A huhova a taka kan chan tlan theih ber Chhawnghnawh hi holam lo deuh taka urhsun zawka hman theih tura ruahman thiam a pawimawh hlein a rinawm.
Intihhlimna leh ennawm lam buatsaihah pawh hian, naupang leh thalai zawktena an tangkaipui theih tur hnam nun ze mawi, entir nan ‘aia upa zah’ lamhawi pholang thei drama chan te pawh thil pawimawh tak a nih a rinawm. Aia upa zah phei hi chu naupang leh thalaite hian, a bikin khawpuiah chuan an hre tawh mang lo niin a lang.
Tuna Kût kan hman dan hi chu musical concert ni mai awm hi a ni tawh a, chu chu insensona lian tak pawh a ni. Hman lai ang diak diaka Kut te hi kan hmang thei lo a nih rau rau chuan hnam nun chawisanna lam hawi te hi uar tharin chawi lar law law ila, kan thatpui phian maithei e.