Kuthnathawktute hma ngaiin SEDP-ah sawrkarin sum tam tak a dah – Dy CM

Kuthnathawktute hma ngaiin SEDP-ah
sawrkarin sum tam tak a dah – Dy CM
Mizoram sawrkarin kuthnathawktute hma ngaiin SEDP ah sum tam tak dah a ni tih deputy chief minister Tawnluia chuan a sawi.
Ni li chhung awh tur Horticulture Fair 2023 Aijal Club Park-a neih chu Thawhlehni khan deputy chief minister hian a hawng a. Kuthnathawktute chu hnam rohlu an ni, tiin, an thawhrimna fakawm a tih thu a sawi a. Mizoram hmasawnna sulsutu pawimawh tak an ni tih inhrereng turin a chah. Mizoramin mahni tharchhuah tam tak a neih thu sawin, Mizo kutchhuak ngaihlu a, leisak fo turin mipui a ngen.
Kuthnathawktute hmakhua ngaiin sawrkarin SEDP hnuaiah sum tamtak a dah a ni tih a sawi a. Kuthnathawktute thawhrimnate a thlawn mai loh nan anmahni tanpui leh dawmkang turin sawrkar department an awm reng tih a sawi a ni.
Mizoramin leilung hausakna a neih sa hmanga economy khaikanna tur remchang a neih langsar ber pakhat chu ‘bamboo development’ a ni tih Tawnluia hian a sawi a. Mau hmanga Mizoram tihhmasawn chu chief minister-in a ngaipawimawh hle, tiin, “Hmasawnna hi vawikhatah a lo kal nghal vek thei lo a, dawhthei taka nghah a ngaih chang a awm fo thin,” tiin dawhtheih turin Zoram mipui a ngen.
State-in a tharchhuah hralhna kawngah state chhung mipui chawm tur bakah state pawn market ngaihtuah tel a ngai a, state pawn market hi a kaihhnawih department ten uluk takin ngaihtuahna an sen a tul tih a sawi. Tunhnai maiah Sialhawk lakhuihthei chu state pawnah thawnchhuah a nih thu sawiin, “Kan tharchhuah tam zawk state pawnah thawn thei turin farmer leh sawrkar department-te tanrual a ngai a ni,” a ti.
Horticulture Fair-ah hian state pawn atangin mau atanga thilsiam zuar thinte sawm niin, stall nei thei pali – Beyond Terry Towels Maharashtra, Bamboo and Cane Development Institute (BCDI) Agartala Tripura, National Institute of Design (NID) Bengaluru leh North East Cane and Bamboo Development Council (NECBDC) Burnihat Assam-te an lo tel thei.
fair hawnnaah hian District tin atangin farmer hlawhtling mi pakhat zel thlanchhuahte hnenah ‘Best Farmer Award 2023’ lawmman pek niin, he Award hian lawmpuina thuziak leh sumfai cheng singkhat a keng tel.