KUTPUI LEH FAINA LAMTLUANG

By Kima Mivam
Mizote kutpui leh Kristianna hnua kan lawm nasat ber, kan kut pui ber, Chapchar Kut chu kan hmang zo ve ta reng mai a, kum dang aiin kan hmang uar deuh a tih theih ang, Covid hripui boruak a reh fel hnua pangngai taka kan kut leh hmasak ber a nih vang pawh a ni mahna, kut chhim leh nuam ti tak tak hmel hmuh tur pawh a awm nual e. Sawrkar hnathawk te pawhin a hma ni ah, Zo thuam hak ni remchangah la in kut an lo urlawk hmasa bawk nen, a boruak a inman tha chho khawp chuan a lang.
Kan thalaite an chhe lo em em a, a bikin kan nulate pawh an hmuhnawm, chutih lai chuan kan lan mawi loh hlauin sawrkar chuan vawk in tawp tak te a khuh mawi tir a, G20 palaite laka lan mawi loh a hlau ve te pawh a ni ang. A tih awm tak a ti a ni ang. Mahse, lan mawi tum eng ang mah ila, kan hnawm paih danin kan nihna tak a rawn pho lang a, Lammual grass chung velah chuan kan thil eina hmanrua paper chhhia leh dispo hman tawh hnu erawh a hnawk nuai a, chutiang chuan mi nawlpuiin Lammual kan kalsan ni awm takin social media lamah a lo lang a, lan mawi kan tumna zawng zawngte kha a rawn khuh bo ta daih mai.
Lan mawi tum eng ang pawh ni ila, chhungril mawina leh thatna kan neih loh avang hian mawina lem chuan min tuam mawi kumtluan thei lo a nih dawn hi a tih theih. Chutah chuan, lammual kan hnawk kalsan bik kha han sawi chhunzawm ta ila. Kan hnawmhnawk kalsan darh nuai mai kha ram dangte thlenga an hmuh turin Social Media lamah kan tarlang duh ta mai thin si a, rilru chu a lo na ve hle mai. Kan mawina tam tak awm hi pholang lo hian kan chhiatna hi Social media-ah rang takin kan phochhuak fo ta mai a, thil tha tak chu a ni chiah lo, intihhmuh chi loh tak a ni.
Chutah chuan tih theih kan nei em tih hi rilruah a lo lian ta hle mai a, hmalak dan tur hrang hrang leh ram changkang zawkte chet dan te mitthlaah a lang uarh uarh a. Kut pui thlir let pahin faina kawnga kan tih theih tarlanna remchang a inhawngah ngai ta mai ila.
World cup kan en khan Japan inkhel bik kha han ngaihtuah let ila, inkhelh zawh apiangin an garbage bag ken chu Japan fans ten an phawrh a, hnawmhnawk an chhar khawm thin a ni. Chu chu social media lamah pawh a darh nasa thin hle, an vawi khat tihna a ni lova, kum hmasa lam pawhin hetiang hi kan hmu fo tawh thin a ni.
Kan kut puiah khan chutiang chu kan ti ve thei reng ang a, Gate-ah khan Garbage bag lo sem ta mai se, a nih loh pawhin ticket lak pahin lo leitir mai ila, thil man to a ni si lo va. Lammuala hnawmbawm hun dawn chuan hunna tur a tam dawn lutuk a, a rem teuh lo thei a, chu kan garbage bag ah chuan kan thil eina leh hnawm dang dah theih remchang chu dah khawm ila, kan haw pahin khai chhuak ila, dahna tur hmun siam bikah dah khawm mai ila, hotute lam atang pawhin a paihna turte chiang takin han puang ta bawk sela, kan Lammual kha kan kalsan mawi hnai zawk hian a rinawm a ni.
Faina chungchang hi awareness kan neih that a tul hle bawk. Kut hma khan ‘Clean Zarkawt Tshirt’ ha ten Zarkawt khawlai fangin hnawm an ti fai a, mahse, a hminga tifai mai an ang thin, fai duhna tak tak hi naupang te atanga kan tuh a ngai viau a, awareness tha zawk hi kan neih a hun viau mai. ‘Save chite Lui project’ pawh kan bei chiam a, awareness lamah kan tuan nasa tawk lo, Chite lui lama bawlhhlawh kan tifai leh ringawt zel a, awmzia awm lo. An paih zel tho, chu ai chuan mipuite-ah hian, kawngsir kawr leh kawr pui dangtea hnawmhnawk paih duh miah lohna thinlung kan tuhsak a ngai, Lammual chauh ni lovin kan ni tin nunah hian hnawm paih dan dik hi awareness tha zawk kan neih a hun viau a ni.,
Tin, han sawi belh ila, ram changkang zawka an tih fo angin Zirlai uniform ha chin te hi chuan Inrinni zing tin hian Vantlang hmun phiah fai hnatlang nei ziah se, exercise a ni pah ang a, kan fa te phone khawih nasa lutuk a veng ang a, tin, hei ai hian an active phah ang, Mizo ten thu kan awih a, hei hi thil tih harsa niin a lang lo. A hma la theitu hian hma la sela chuan mipui thuawih thei tak chuan kan zawm dual dual a rinawm.