Kylie Minogue chu 2024 Brits Global Icon award hlan a ni dawn a, he award hi March ni 2-a Brit Awards sem hunah an hlan dawn a ni. Kumin Brit Awards-ah hian Minogue hi international artist of the year category-ah nominate a ni a, award semnaah hian a perform nghal dawn bawk a ni. He award semnaah hian Dua Lipa leh RAYE te pawh an perform dawn tih an lo puang tawh bawk.
Brits Global Icon Award hi Brit Awards-a chawimawina sang bera sawi thin a ni a, he award hi chi kum tin an sem lem lo a, kum thum kalta khan Taylor Swift-i’n a lo dawng tawh a, 2014-ah Elton John, 2016-ah David Bowie leh 2017-ah Robbie Williams ten an dawng tawh bawk.
Minogue chuan thuchhuah siamin, “Global Icon Award hlan ka ni tur hian min tiphur tak zet a, artist ropui tak tak te hnung ka zui ve dawn ta a ni. UK hi ka channa pakhat ang mai a ni a, Brits pawhin ka thinlungah hmun a chang thuk hle a, kum liamta lamah he award-ah hian hriatreng tawh tur thil tam tak ka lo tawng ve tawh a, Brits stage-a kir leh hun hi ka nghalhlel tak zet a ni. O2-ah kan inhmu vek dawn nia,” a ti.
Kumin Brit Awards-ah hian Minogue leh Taylor Swift te pawh international artist of the year-ah nominee an niho a, he category-ah hian Asake, Burna Boy, Caroline Polachek, CMAT, Lana Del Rey, Miley Cyrus, Olivia Rodrigo leh SZA te nen an awmho.
Minogue sawi takah hian February ni 18 a sem tur, Prople’s Choice Awards-ah pawh a perform dawn e. Minogue hian tun thla tira an sem tak Grammy Awards-ah khan ‘Padam Padam’ avangin best pop dance recording a dawng a, hei hi tun kum 20 chhuanga Grammy Award a dawn leh vawi khatna a ni.
Kumin Brit Awards nomination-ah hian RAYE a langsar ber a, nomination pasarih a nei a, hei hi Brits record, tum khata he award nomination a lang hnem ber a ni a, British rapper Central Cee leh J Hus ten nomination pali ve ve neiin an dawt.
Kylie Minogue-i’n Brits Global Icon Award dawng dawn
