Site icon The Aizawl Post

Kyrie Irving a che\ha nghal

February 9, Ninga zing khan NBA regular season khelh chhunzawm a ni a, Kyrie Irving chu a club thar Dallas Mavericks tan a chetha nghal viau a, a team thar hi Los Angeles Clippers lakah a chakpui. Inkhel dangah Portland Trail Blazers chuan champion lai Golden State Warriors an hneh ve bawk.

Dallas Mavericks in Los Angeles Clippers an hmachhawn tumin an player thar Kyrie Irving chuan bul a tan a. Brooklyn Nets chhuahsan a, Mavericks zawm thar Irving hi a club thar tan mit la takin a inlan nghal. Clippers an hmachawn tum hian Mavericks in an player pawimawh Luka Doncic chhawr thei lo mah se, Irving hi an chakna hnar pawimawh a ni a, an player thar hian point 110-104 a Los Angeles Clippers an hneh tumin point 24 a thawkchhuak.
Cleveland Cavaliers, Boston Celtics leh Brooklyn Nets tan hlawhtling taka lo khel tawh a, All-Star ah vawi riat ngawt tel tawh Irving hian a khelh mekna Brooklyn Nets hnenah chhuah a dil a, a dil angin Nets hian chhuah an phalsak a, Dallas Mavericks a awm. Irving club thar Mavericks hi Western Conference-ah palina an ni mek a, Luka Doncic an neih sa tawh bakah Kyrie Arving an neih belh leh bawk nen champion turin rin an kai lehzual hle.

Ningani zinga inkhel hmuhnawm takah Portland Trail Blazers chuan champion lai Golden State Warriors chu harsa takin an hneh thei hram. Point 125-122 a Warriors an hneh tum hian Blazers player pawimawh Damian Lillard a chetha leh viau a, triple-doubles a puitlin. Lillard hian Golden State Warriors lakah hian point 33 a thawkchhuak a, assist vawi 11 a neih bakah ball sawhlet vawi 10 a dawng tling bawk.

Champion lai Golden State Warriors hian hliam vangin an player pawimawh Stephen Curry an chhawr thei lo nawn leh a. Curry awm loh lai hian Klay Thompson chuan a piancham vawi 33 lawm nan point 31 a thawkchhuak a, three points vawi sarih ngawt vawm lut bawk mahse, point thuma an team tlawm tur a chhan him zo chuang lo thung.
Harsa taka Blazers an chak hram lai hian Minnesota Timberwolves chuan an khingpui Utah Jazz chu 143 – 118 zetin an sawp ve thung. Point 25 zeta Utah Jazz an sawp tum hian Timberwolves tan Anthony Edwards chuan point 31 a thawkchhuak a. Jaylen Nowell chuan NBA game khata point a thawhchhuah tam ber tum tawng ve bawkin point 30 a thawkchhuak bawk.

Bazar titi
Basketball hmanga inelna lian leh lar NBA ah bazar a inhawng mek a, player lut leh chhuak thar an awm nual dawn niin tarlan a ni. Football a ‘transfer’ an tih mai ang hi NBA-ah chuan ‘Trade’ tih a ni ve thung a. Trade inhawng mek hi keini huna ningani zan khan a tawp dawn.

Trade inhawn laiin Brooklyn Nets player pawimawh Kevin Durant chu Phoenix Suns pan tur angin sawi rik a ni a, hei hian ngaihven a hlawh hle. NBA-ah vawihnih champion tawh Durant leh TJ Warren ten Nets chhuahsanin Suns an pan ang a. Suns atangin Mikal Bridges, Cam Johnson leh Jae Crowder ten Nets an pan ve thung dawn niin tarlan a ni. LeBron James-a khelhna Los Angeles Lakers chuan an point guard Russell Westbrook chu Utah Jazz hnenah chhuah an phalsak niin tarlan a ni bawk.

Exit mobile version